Оросын эзлэн түрэмгийллээс газар нутгаа чөлөөлөх Украины армийн сөрөг давшилтын хурд “хүссэн хэмжээнд хүрэхгүй” байгааг тус улсын ерөнхийлөгч Володимир Зеленский хүлээн зөвшөөрчээ.
“Зарим хүмүүс үүнийг Холловүүдийн кино шиг төсөөлж, үр дүн нэхэж байна. Гэхдээ энэ тийм биш. Хүмүүсийн амь настай холбоотой асуудал” гэж тэр BBC сувагт өгсөн ярилцлагынхаа үеэр хэлсэн байна.
Сөрөг давшилт эхэлснээс хойш хоёр долоо хоног орчим хугацаанд Украины арми зүүн бүсийн Донецк, өмнөд бүсийн Запорожье мужийн нутагт нийт найман тосгоныг чөлөөлөөд байгаа.
Чөлөөлөх ажиллагаа удааширч байгаагийн гол шалтгаан нь Оросын тал Украины 200,000 км.кв газар нутгийг бүрэн минажуулсантай холбоотой гэж Зеленский тайлбарласан байна.
“Юу ч хүсэж байсан, бүр дарамт шахалт үзүүлж байсан ч бид тулааны талбарт хамгийн сайн гэж үзсэн арга замаараа урагшлах болно” гэж тэр хэлжээ.
Зеленскийгээс дайны эцсийн үр дүн ямар байхыг асуухад Украин улсад “ялалт зайлшгүй хэрэгтэй” гэж хариулсан байна.
Тухайлбал Оросын цэрэг Украины газар нутагт байгаа тохиолдолд Москвад хэн ерөнхийлөгч байхаас үл хамааран тэдэнтэй хэлэлцээний ширээний ард суухгүйг тэр мэдэгджээ.
“Манай армийн сөрөг давшилт хаа хүрэхээс үл хамаараад бид мөргөлдөөнийг энхийн гэрээ байгуулан зогсоох хүсэлгүй байна. Учир нь энэ бол дайн, энэ бол Украины ирээдүй биш” гэж Зеленский хэлсэн юм.
Өнгөрсөн долоо хоногт ОХУ-ын ерөнхийлөгч Владимир Путин тактикийн цөмийн зэвсгээ Беларусь улсын нутаг дэвсгэрт байрлуулж байгаагаа мэдэгдсэн.
Энэ талаар Зеленский байр сууриа илэрхийлжээ.
“Манай эхний хэсэг газар нутгийг булаан эзэлсэн 2014 оноос хойш Путин бидэнд аюул занал учруулсаар байгаа. Тэр цөмийн зэвсэг хэрэглэх талаар ярих нь тодорхой. Тэр үхэхээс айдаг тул ингэж зүрхлэхгүй гэж бид бодож байна. Гэхдээ энэ нь баталгаатай биш. Ялангуяа 21 дүгээр зуунд хөршийнхөө нутаг дэвсгэрийг булаан эзлэх дайн эхлүүлж чадсан хүнээс юу ч гарч болно” гэж тэр ярьсан байна.
Санкт Петербургийн олон улсын эдийн засгийн чуулганы үеэр Путин түүнийг жүүд хүн биш, жинхэнэ жүүд хүмүүсийн хувьд ингэх нь гутамшиг гэж ярьсан юм. Энэ талаар Зеленскийгээс асуухад тэр гүн амьсгаа авч, хэсэг чимээгүй суусны дараа “Тэр юу ярьж байгаагаа сайн ойлгохгүй байх шиг байсан. Уучлаарай, тэр Хитлерийн дараа төрсөн антисемитизмийн хоёр дахь хаан шиг л аашилж байна. Ерөнхийлөгч хүн ингэж ярьж байна шүү дээ. Соёл иргэншилт ертөнц ингэж ярьж чадахгүй. Надад дэлхий нийт түүний үгийг хэрхэн хүлээж авч байгаа нь л чухал бөгөөд уг дэмжлэгт нь би талархаж байна” гэж ярьжээ.
Эх сурвалж: BBC
