Евгений Пригожин болон түүний Вагнер группийн хөлсний цэргүүд Москва хотыг чиглэсэн маршаа зогсоосны дараа Оросын дотоод нөхцөл байдал бүрхэг байна.
Бямба гарагт Беларусийн ерөнхийлөгчийн зуучлалтай байгуулсан тохиролцооны дараа Вагнерын цэргүүд Украин дахь байрлал руугаа буцаж, Москва хот Ням гарагаас эхлэн хамгаалалтаа сулруулжээ.
Энэ үеэс хойш Пригожин болон Путиний хэн нь ч ямар нэг мэдэгдэл хийгээгүй, нам гүм байна.
Тохиролцооны дагуу Пригожин өөрт нь тулгасан ялыг цуцлуулж, хөрш Беларусь улс руу дүрвэсэн юм.
Өчигдөр АНУ-ын төрийн нарийн бичгийн дарга Энтони Блинкен анх удаа Вагнерын бослогын талаар байр сууриа илэрхийлжээ.
“Оросын засаглалд илүү олон хагарал үүссэн нь сая ил боллоо гэж би бодож байна. Энэ нь хаа хүртэл ямар хугацаанд үргэлжлэх талаар хэлэхэд хэтэрхий эрт байгаа ч ойрын өдрүүдэд, ойрын саруудад Путинд олон шинэ сорилт тулгарах нь тодорхой боллоо” гэж NBC сувгийн “Meet the Press” хөтөлбөрт оролцохдоо Блинкен хэлсэн байна.
Вагнерын зэвсэгт хүчин бараг эсэргүүцэлгүй, маш хурдтай нийслэл Москвад ойртож очсон нь Оросын аюулгүй байдал ямар эмзэг болсныг харуулаад байгаа.
“Вагнер групп сүүлийн нэг өдрийн дотор Украины гурван долоо хоногийн сөрөг давшилтын үеийнхээс ч илүү их хохирлыг Оросын агаарын хүчинд учруулсан гэж би бодож байна” гэж CAN судалгааны хүрээлэнгийн Орос судлал хариуцсан захирал Майкл Кофман ярьжээ.
Үнэхээр Вагнерын зэвсэгт хүчин богино хугацаанд Оросын армийн хэд хэдэн нисдэг тэрэг, харилцаа холбооны нисэх онгоцыг унагасан юм. ОХУ-ын батлан хамгаалах яам энэ талаар тайлбар өгөөгүй байна.
“Путин болон Оросын армийн нэр хүнд унасан нь Украины хувьд чухал ач холбогдолтой. Пригожин тайзнаас бууж, Беларусьт очлоо. Гэхдээ энэ нь үнэхээр Евгений Пригожин болон Вагнер группийн төгсгөл мөн үү?” гэж Их Британийн зэвсэгт хүчний жанжин штабын дарга асан Ричард Даннат хэвлэлд ярьжээ.
Тохиролцооны дагуу зэвсэгт бослогод оролцоогүй Вагнерын хөлсний цэргүүд ОХУ-ын батлан хамгаалах яамтай энэ сард багтаан гэрээ байгуулж, шууд удирдлагад нь шилжихээр болсон юм.
“Ойрын өдрүүдэд тэр Беларусь руу хэр хэмжээний хүн хүчтэйгээ явсан нь тодорхой болох байх. Хэрвээ Пригожин хангалттай тооны хүч дэргэдээ авч үлдсэн бол Украинд учруулах аюул хэвээр байх болно” гэж Даннат тайлбарласан байна.
Ням гарагт Украины ерөнхийлөгч Володимир Зеленский АНУ-ын ерөнхийлөгч Жо Байдентай утсаар ярьжээ.
Тэд Вагнерын зэвсэгт бослогын талаар голлон ярилцсан байна.
“Хэдийгээр Вагнерын цэргүүд маршийнхаа турш алга ташилтаар угтуулж байсан ч төсөөлж байсан шигээ дэмжлэг авахгүйгээ ойлгосон гэж би бодож байна. Энэ нь Пригожиний ухрах шалтгаан болсон байх” гэж АНУ-ын Тагнуулын Төв Газрын захирал асан Дэвид Петраесус CNN сувгийн “State of the Union” хөтөлбөрт оролцохдоо ярьжээ.
Ням гарагт Оросын төв телевизийн сувгууд Дон дахь Ростов хотоос явж буй Вагнерын анги нэгтгэлүүдийг харуулж, хямралыг мэргэн ухаанаар зохицуулж чадсан Путинийг магтаж байв.
Гэхдээ энэ үйл явдал Оросын олон нийтийн дунд Путиний дэглэмийн нэр хүндийг нэлээд сулруулсан гэж Өрнөдийн ажиглагчид дүгнэж байна.
Эх сурвалж: Associated Press
