Өнгөрсөн долоо хоногт Кремлийн эрх баригчдын эсрэг зэвсэгт бослого гаргасан гэгдэж буй Вагнер хувийн зэвсэгт хүчний компанийн тэргүүн Евгений Пригожин удтал нам гүм байсны эцэст өчигдөр дахин олны өмнө ил гарлаа.
11 минутын урт видео мэдэгдэлдээ тэр өнгөрсөн долоо хоногт Оросын армийн пуужингийн цохилтын улмаас 30 хөлсний цэрэг нь алагдсан тул Вагнерыг аврах зорилгоор зэвсэгт бослогыг зохион байгуулснаа тайлбарлажээ.
“Шударга бус явдлын улмаас бид маршаа эхлүүлсэн юм” гэж Пригожин мэдэгдэлдээ өгүүлсэн байна. Гэхдээ тэр төрийн эргэлт хийх зорилгогүй, зөвхөн батлан хамгаалах яамны удирдлагуудаас хариуцлага нэхэх гэж үүнийг хийснээ тайлбарласан юм.
Тэрбээр хувийнхаа зэвсэгт хүчний энэ удаагийн маршийг 2022 оны хоёрдугаар сард Оросын арми Украиныг яаж эзлэх ёстой байсныг харуулсан “үлгэр жишээ хичээл” гэж магтжээ.
Пригожин бас Вагнерын дайчдыг Москвагийн чиглэлд 780 км зам туулахад ямар ч эсэргүүцэл үзүүлж чадаагүй Оросын зэвсэгт хүчнийг элэглэн шоолсон байна.
Эцэст нь тэр Беларусийн ерөнхийлөгч Лукашенко өөрт нь Вагнерын үйл ажиллагааг хууль ёсны дагуу үргэлжлүүлэх санал тавьсныг мэдэгджээ.
Ингэхдээ аль улсын хуулийн дагуу гэдгийг тодорхой хэлээгүй байна.
Оросын зарим хэвлэл Украины хойд хилээс 200 км зайтай Беларусийн нутагт Вагнерын 8,000 хүртэл цэргийг байрлуулах хуаран байгуулагдаж байгаа тухай мэдээлжээ.
Харин Беларусийн сөрөг хүчний “Беларуски Хаджун” ажиглалтын бүлэг ийм хуаран байгуулж байгаа болон Вагнерын цэргийн цуваа хилээр нэвтэрсэн ямар ч шинж тэмдэг илрээгүйг мэдээлсэн байна.
Бослогын үеэр Вагнерын зэвсэгт хүчин Оросын армийн хэд хэдэн нисдэг тэрэг, харилцаа холбооны нэг онгоцыг буудаж унагасны улмаас 15 алба хаагч амь үрэгдсэн гэсэн мэдээлэл бий.
Өчигдрийн мэдэгдэлдээ Пригожин үүнд харамсал илэрхийлсэн ч цэргийн цувааг нь бөмбөгдсөн тул ингэхээс өөр арга байгаагүй гэж тайлбарлажээ.
ОХУ-ын батлан хамгаалах яам Вагнерын хуаранд пуужингаар довтолсноо эрс үгүйсгэж байгаа. АНУ-ын тагнуулын албад Пригожинийг эртнээс хилийн ойролцоо хүчээ хуримтлуулж байсан тул зэвсэгт бослогыг урьдаас төлөвлөж, бэлдсэн ажиллагаа байх магадлалтай гэж дүгнэснийг албаны эх сурвалж саяхан мэдээлсэн юм.
Вагнерын бослогыг зогсоох тохиролцооны дагуу Пригожинд тулгасан ялыг цуцалсан гэж Кремлийн хэвлэлийн алба мэдээлж байсан. Харин өчигдөр Оросын зарим хэвлэлүүд түүний хэрэг хаагдаагүй, шалгалт үргэлжилж байгаа гэж мэдээлжээ.
Одоогоор Вагнер групп болон Пригожиний хувь заяа хааш эргэх нь тодорхойгүй хэвээр байна.
Европын Холбооны гадаад бодлогын тэргүүн Жозеп Боррел өчигдөр хийсэн мэдэгдэлдээ Украины дайн Оросын улс төрийн системд хагарал үүсгэснийг энэ үйл явдал батлан харууллаа гэжээ.
“Путиний бий болгосон мангас одоо өөрийг нь хазаж эхэллээ. Мангас эзэндээ халдаж байна” гэж тэр хэлсэн байна.
Эх сурвалж: Associated Press
