Саяхан Ройтерс агентлаг өнөөдөр амьд сэрүүн байгаа АНУ-ын хууль тогтоогчид, ерөнхийлөгч асан эрхмүүдийн удам сударт боол эзэмшиж байсан хүн байгаа эсэхийг судалсан үр дүнгээ танилцуулжээ.
Ингэхэд ерөнхийлөгч болон ерөнхийлөгч асан хүмүүсээс зөвхөн Дональд Трампын өвөг дээдэс боол эзэмшиж байгаагүй нь батлагдсан байна.
Бусад өндөр албан тушаалтнуудаас дурдвал дээд шүүхийн хоёр шүүгч, 11 мужийн захирагч, конгрессын 100 гишүүн боол эзэмшигчдийн шууд үр удам байжээ.
АНУ-ын анхны хар арьст ерөнхийлөгч Барак Обама хүртэл боол эзэмшигчийн үр удам юм байна.
Тухайлбал түүний цагаан арьст ээжийн удамд боол эзэмшигч байжээ.
Одоогийн ерөнхийлөгч болон амьд сэрүүн байгаа ерөнхийлөгч асан эрхмүүдийн судалгааны үр дүнг жагсаавал:
- Жо Байдены таван үеийн өмнөх нэг өвөг дээдэс нэг боолтой
- Барак Обамагийн зургаан үеийн өмнөх нэг өвөг дээдэс хоёр боолтой
- Жорж Бушийн зургаан үеийн өмнөх нэг өвөг дээдэс 25 боолтой
- Билл Клинтоны таван үеийн өмнөх нэг өвөг дээдэс нэг боолтой
- Жимми Картерын дөрвөн үеийн өмнөх нэг өвөг дээдэс 54 боолтой байжээ.
Гэхдээ Дональд Трампын хувьд өвөг дээдэс нь боолчлох ёс халагдсанаас хойш АНУ-д цагаачилж ирсэн юм байна.
1865 онд АНУ боолчлох ёсыг хуулиар халж байжээ.
Тухайлбал Трампын өвөө, эмээ нарын хэн нь ч АНУ-д төрөөгүй хүмүүс юм.
Түүний эцгийн талын өвөө, эмээ нар Германы өмнөд бүсийн Каллштадт хотод мэндэлж, 1900-аад оны эхэн үед АНУ-д цагаачилж байжээ.
Харин Трампын ээж Мэри нь Шотландад төрсөн хүн юм.
Эх сурвалж: Business Insider
