Хувийн зэвсэгт хүчний Вагнер группийн тэргүүн Евгений Пригожин өнгөрсөн долоо хоногт зэвсэгт бослого гаргахдаа ОХУ-ын батлан хамгаалах яамны удирдлагуудыг олзлох зорилготой байсан ч төлөвлөгөө нь задарсны улмаас зорилгоо биелүүлж чадаагүй тухай “The Wall Street Journal” сонин өчигдөр мэдээлжээ.
Тус сонин мэдээллээ Өрнөдийн тагнуулын албаны эх сурвалжаас олж авсан юм байна.
Батлан хамгаалахын сайд Сергей Шойгу, зэвсэгт хүчний жанжин штабын дарга Валерий Герасимов нарыг Оросын өмнөд бүс нутагт ажиллах үед нь олзлохоор Пригожин төлөвлөж байсан гэнэ.
Гэвч Оросын Холбооны Аюулаас Хамгаалах Алба уг төлөвлөгөөг нь урьдчилж мэдээд тэдний ажлын хуваарийг өөрчилсөн байжээ.
Үүний улмаас Пригожин анхны төлөвлөгөөгөө өөрчилж, Украин дахь байлдааны ажиллагааг удирдаж буй Оросын цэргийн өмнөд тойргийн командын төв байрладаг Дон дахь Ростов хотыг эзлэн авсан юм байна.
Өчигдөр бас “New York Times” сонин Пригожиний төлөвлөгөөг урьдчилж мэдэж байсан хүн нь Украины дайны дэд командлагч, генерал Сергей Суровикин байх өндөр магадлалтайг АНУ-ын албаны эх сурвалжаас уламжлан мэдээлжээ.
Тэрбээр ОХУ-ын армийн генералууд дотроос Пригожинтой хамгийн ойр харилцаатай хүн байсан бөгөөд харин зэвсэгт бослогын үеэр Кремлийн талд орсон байж болзошгүй гэнэ.
Вагнерын ангиуд хөдөлж эхлэхэд хамгийн түрүүнд генерал Суровикин ажиллагаагаа зогсоохыг уриалсан видео мэдэгдэл гаргаж байсан юм.
Үүнээс гадна Пригожинийг амьд үлдэхэд Суровикин нөлөөлсөн байх боломжтойг эх сурвалж бас мэдээлжээ.
АНУ-ын хэвлэлүүдэд гарсан дээрх мэдээллийн талаар сэтгүүлчдийн асуултад өчигдөр Кремлийн хэвлэлийн албаны дарга Дмитрий Песков хариулсан байна.
“Энэхүү үйл явдлын эргэн тойронд маш олон таамаг, хов жив яригдаж байгаа. Үүнийг би тэдгээрийн нэг жишээ гэж бодож байна. Оросын арми болон ард түмэн зэвсэгт бослогын үеэр ерөнхийлөгч Путиний талд тууштай зогсож байсан” гэж Песков хариулжээ.
Зэвсэгт бослого зогссон гол шалтгаан нь Беларусийн ерөнхийлөгч Александр Лукашенкогийн гүйцэтгэсэн үүрэг байсан гэж Кремль албан ёсоор тайлбарлаж байгаа.
Гэхдээ Өрнөдийн ажиглагчид энэ тайлбарт эргэлзэж байгаа юм.
Эх сурвалж: AFP
