Өнгөрсөн долоо хоногийн сүүлээр болсон Вагнерын зэвсэгт бослогоос хойш Оросын армийн хоёр том генерал сураггүй болсон нь анхаарал татаж байна.

Тэдгээр нь Украин дахь “цэргийн тусгай ажиллагаа”-ны командлагч, зэвсэгт хүчний жанжин штабын дарга Валерий Герасимов, түүний орлогч Сергей Суровикин нар юм.

Оросын цөмийн зэвсгийн товчлууртай гурван цүнхний нэгийг эзэмшдэг гэгддэг 67 настай генерал Герасимов зургаадугаар сарын 9-нөөс хойш олон нийтийн өмнө ил гараагүй байна.

Вагнерын тэргүүн Евгений Пригожиний өөрт нь тушаахыг Кремлийн эрх баригчдаас шаардаж байсан хоёр хүний нэг тэр юм. Нөгөөх нь батлан хамгаалахын сайд Сергей Шойгу байлаа.

Зэвсэгт бослогоос хойш сайд Шойгу хэд хэдэн удаа хэвлэл мэдээллийн хэрэгслээр гарсан бол Герасимов огт үзэгдэхгүй байна.

Мягмар гарагт Путин зэвсэгт хүчний төлөөлөлтэй уулзаж, талархал илэрхийлэхэд хүртэл тэр байгаагүй юм.

Сирид маш харгис тактик хэрэглэдэг байсныхаа төлөө “Генерал Армагеддон” хочтой болсон Суровикин хамгийн сүүлд Вагнерын босогчдод байрлал руугаа буцахыг уриалсан видео мэдэгдэл гаргаснаасаа хойш олны нүдний өмнө ил гараагүй байна. Тэрбээр өнгөрсөн онд Украины дайны командлагчаар томилогдож, дараа нь Герасимовт энэ үүргээ шилжүүлээд өөрөө дэд командлагч болж байжээ.

Мягмар гарагт Нью Йорк Таймс сонин нийтлэлдээ Суровикинийг зэвсэгт бослогын төлөвлөгөөг өмнө нь мэдэж байсан хүн байж болзошгүйг АНУ-ын тагнуулын эх сурвалжаас уламжлан мэдээлсэн юм.

Кремлийн хэвлэлийн төлөөлөгч Дмитрий Песковоос өчигдөр сэтгүүлчид генералын хаана байгаа талаар асуухад хариулахаас зайлсхийсэн байна.

Уг асуултаа батлан хамгаалах яаманд тавихыг зөвлөсөн Песков ерөнхийлөгч Путин зөвхөн батлан хамгаалахын сайд, зэвсэгт хүчний жанжин штабын дарга хоёртой шууд харьцдаг гэж тайлбарлажээ.

Тэр бас Пригожин хаана байгааг мэдэхгүй гэж хариулсан байна.

Оросын зарим хэвлэлүүд болон цэрэг дайны сэдвээр дагнадаг блогууд Суровикинийг баривчлагдсан, Москвагийн Лефортовогийн хорих газарт байцаагдаж байгааг мэдээлжээ.

Тухайлбал Оросын батлан хамгаалах яамны хэвлэлийн төлөөлөгч байсан хүний ажиллуулдаг гэгддэг Телеграм сүлжээний Рыбарь суваг “цэвэрлэгээ эхэлсэн” гэж мэдээлсэн юм.

Түүний баталж байгаагаар зэвсэгт бослогын үеэр шийдэмгий ажиллаж, Вагнерын хүчийг эрт зогсоож чадаагүй армийн албан тушаалтнуудыг мөрдөн шалгах ажиллагааг Кремль эхлүүлсэн гэнэ.

Зэвсэгт бослогын дараа Путиний ойрын хүрээлэлд хэвээр үлдэх нь тодорхой болсон хүмүүст батлан хамгаалахын сайд Сергей Шойгу, үндэсний гвардын тэргүүн Виктор Золотов нарын нэр яригдаж байна.

Эх сурвалж: Reuters