Өчигдөр буюу Пүрэв гарагт Туркменистан улсын эрх баригчид ерөнхийлөгч асан Гурбангулы Бердымухамедовт зориулж цоо шинээр байгуулсан хотоо албан ёсоор нээжээ.
Шинэ хотын нэр Аркадаг бөгөөд энэ нь “улс орноо хамгаалагч” гэсэн утгатай Бердымухамедовын албан бус цол хэргэм ажээ.
Өчигдөр экс ерөнхийлөгчийн төрсөн өдөр байсан бөгөөд тэр 66 нас хүрсэн юм.
73,000 оршин суугчтай шинэ хотыг байгуулахад Туркменистан улсын засгийн газар $3.3 тэрбумыг зарцуулжээ.
Аркадаг хотын бүх барилга Бердымухамедовын дуртай цагаан өнгөтэй, бас бүгд “азын тоо” гэгддэг долоон давхар өндөр юм байна.
Туркмены алдарт Ахал Теке үүлдрийн адууны алтадсан хөшөөтэй тус хотод зөвхөн цахилгаан хөдөлгүүртэй автомашин зорчих гэнэ.
Шинэ хотыг бас Бердымухамедовын төрөлх тосгонтой ойрхон газарт байгуулжээ.
Хотын нээлтэд Туркменистаны ерөнхийлөгч Сердар Бердымухамедов оролцсон байна. Одоо 41 настай тэрбээр Гурбангулы Бердымухамедовын хүү юм.
Нээлтийн ажиллагаанд баяр хүргэж, Туркийн ерөнхийлөгч Рэжэп Тайип Эрдоган цахилгаан автомашин бэлэглэснийг энэ үеэр гардуулсан байна.
Эцэг Бердымухамедов Туркменистан улсыг 15 жил удирдаад 2022 онд эрх мэдлээ хүүдээ шилжүүлсэн юм.
Гэхдээ тэр одоо Ард Түмний Зөвлөл хэмээх төрийн байгууллагаараа дамжуулан улс орны ихэнх эрх мэдлийг атгасан хэвээр байгаа.
Өөрт нь зориулсан хотын нээлтийн үеэр эцэг Бердымухамедов эх орондоо байгаагүй бөгөөд Саудын Арабын Мекка хотод жил бүр болдог исламын шашинтнуудын хаж мөргөлд оролцож байжээ.
Эх сурвалж: Reuters
