Өнгөрсөн долоо хоногийн Мягмар гарагт 17 настай Нахел хэмээх залуу Парис хотын захад замын хөдөлгөөнд оролцож байхдаа цагдаа нарын шаардлагыг биелүүлээгүй шалтгаанаар буудуулж алагдсан нь Франц даяар томоохон үймээн самуун, эмх замбараагүй байдал дэгдэхэд хүргэсэн билээ.
Хохирогч залуу Алжир гаралтай нэгэн байсан бөгөөд энэ нь араб, африк цагаач иргэдийг хилэгнүүлэх шалтгаан болсон юм.
Өнгөрсөн өдрүүдэд Францын бараг бүх том хотуудад цагаач иргэд үймээн дэгдээж, байшин барилга, автомашинуудыг галдан шатааж, дэлгүүрүүдийг тонон дээрэмдэж байв.
Францын дотоод хэргийн яам дэг журам сахиулахаар цагдаагийн 45,000 албан хаагчийг дайчилж, олон мянган хүнийг баривчлаад байна.
Ням гарагт хохирогч залуугийн эмэг эх Надя телевизээр үг хэлэхдээ хүчирхийллээ зогсоож, амар амгалан байдал тогтоохыг уриалсан юм.
“Үймээн самуунаа зогсоо, эвдэн сүйтгэхээ боль. Үймээн дэгдээж буй хүмүүст хандаж хэлэхэд: битгий цонх хагал, сургууль, автобус руу битгий дайр. Эдгээр автобусаар ээжүүд зорчдог юм” гэж ярьсан тэрбээр “Нахелын үхлийг хүчирхийллээ зөвтгөх шалтгаан болгохгүй байх, орон даяар амар амгалан байдал тогтоох”-ыг уриалсан байна.
Тэрбээр ач хүүгийнхээ үхэлд буруутай цагдаагийн алба хаагчийг өршөөхгүй ч нийт цагдаа нарыг үзэн ядаагүйгээ энэ үеэр илэрхийлжээ.
Ням гарагийн орой Францын ерөнхийлөгч Эммануэл Макрон нөхцөл байдлыг хэлэлцэх уулзалтыг холбогдох яамдын сайд нартай хийхээр болсныг Элизейн ордон мэдээлсэн байна.
Бямба гарагийн шөнө хууль сахиулагчид 719 хүнийг баривчилсан нь Баасан гарагийн 1,300 гаруйгаас буурсан үзүүлэлт болжээ.
Үүнээс гадна цагдаагийн 40 гаруй албан хаагч бэртэж, босогчид 577 автомашин, 74 байшин барилгыг шатаасан байна.
Гэхдээ Бямба гарагийн шөнө ихэнх хотуудад нөхцөл байдал өмнөхөөсөө тогтворжсоныг Францын дотоод хэргийн сайд Жералд Дарманин өчигдөр мэдээлжээ.
Бямба гарагийн шөнө гарсан хамгийн ноцтой хэрэг нь Парисаас өмнө зүгт 15 км зайтай оршдог Хай-лес-Роуз хотын дарга Винсент Жанбруны хувийн сууц руу босогчид шатаж буй автомашинаар дайран орсон явдал байлаа.
Тухайн үед хотын дарга ажил дээрээ байсан ба гэртээ байсан эхнэр, тав ба долоон настай хоёр хүүхэд нь бэртжээ.
“Өнгөрсөн шөнө урьд өмнө болоогүй аймшигтай, гутамшигт үйл явдал тохиолоо” гэж хотын дарга сошиал хуудсандаа энэ тухай бичсэн байна.
Орон нутгийн прокурорын газар хүн амины хэрэг үйлдэхийг завдсан хэрэг үүсгэн шалгаж эхэлснээ Ням гарагт мэдэгджээ.
“Хотын даргын гэрт гал тавих зорилгоор автомашин ашигласан нь урьдчилсан байдлаар тогтоогдлоо. Автомашинаас шатаагч шингэнтэй Кока Коланы лонхнууд олдсон” гэж прокурорын байгууллагын төлөөлөгч мэдээлсэн юм.
Халдлагын үеэр Жанбруны эхнэрийн хөл хугарсан юм байна.
Ням гарагт Хай-лес-Роуз хотод дотоод хэргийн сайдтайгаа хамт ирсэн Францын ерөнхий сайд Элизабет Борне халдлага үйлдсэн этгээдүүдэд хуулийн хариуцлага тооцохоо амлажээ.
Ерөнхийлөгч Эммануэл Макрон саяхан хийсэн мэдэгдэлдээ хүүхдүүдээ харж хандахыг эцэг эхчүүдэд уриалсан юм.
Хууль зүйн яамны мэдээлснээр баривчлагдсан хүмүүсийн 30 хувь нь насанд хүрээгүй хүмүүс байжээ. Дотоод хэргийн сайд Дарманин баривчлагсдын дундаж нас 17 байгааг бас мэдэгдэлдээ дурдаж байсан юм.
Хохирогч Нахелын оршуулгын ёслол Бямба гарагт Парисын дагуул хот Нантерред тайван байдалд болж өнгөрчээ.
Тэрбээр замын хөдөлгөөний дүрмийг удаа дараа зөрчиж байсан түүхтэй, жолоо барих эрхгүй нэгэн байсныг прокурорын байгууллага мэдээлсэн юм.
Нахелыг буудсан 38 настай цагдаагийн офицер одоо хүний амины хэрэг санамсаргүй үйлдсэн хэргээр хоригдож байна.
Эх сурвалж: AFP