Сүүлийн долоо хоногийн турш Франц орныг доргиож буй үймээн самууны эхлэлийг тавьсан цагдаагийн офицерт хүмүүсийн хандивласан мөнгөний хэмжээ Даваа гарагийн байдлаар 986,000 евро ($1 сая) хүрсэн байна.

Барууны үзэлтэй улс төрийн тоймчийн gofundme.com сайт дээр үүсгэсэн хандивын аянд 40,000 гаруй хүн нэгдсэн байна.

Харин уг цагдаагийн албан хаагчид буудуулж амиа алдсан 17 настай Нахелд цуглуулсан хандивын хэмжээ дөнгөж 189,000 евро хүрчээ.

Алжир гаралтай Нахел нь ээжтэйгээ хамт Парисын захын дүүрэгт амьдардаг байсан юм.

Өнгөрсөн долоо хоногийн Мягмар гарагт тэр замын хөдөлгөөнд автомашинтай оролцож байхдаа цагдаагийн шаардлагыг биелүүлэлгүй зугтахыг завдсаны улмаас буудуулан амиа алдаж байв.

Санамсаргүй хүн амины хэрэг үйлдсэнд буруутгагдсан 38 настай цагдаагийн ажилтан одоо хоригдож байна.

Энэхүү аллагын улмаас Францын томоохон хотуудад арьс өнгөний үзэл, нийгмийн тэгш бус байдлыг эсэргүүцсэн үймээн самуун дэгдэж, эмх замбараагүй байдал үүссэн нь өнөөдрийг хүртэл үргэлжилж байгаа.

Энэ үйл явдал бас Францын иргэдийг хоёр хуваагдахад хүргээд байна.

Барууны улс төрийн үзэлтнүүд нь хууль сахиулагчдыг өмгөөлж байгаа бол зүүнийхэн арьс өнгөний үзлийн хохирогч болсон цагаач залууг өмөөрч байгаа юм.

Үймээн самууны үеэр цагаач иргэд бусдын өмчийг галдан шатааж, эвдэн сүйтгэж, дээрэмдэн тонож байгаа нь дээрх хуваагдлыг улам гүнзгийрүүлээд байна.

Хандивын хөдөлгөөнийг эхлүүлсэн улс төрийн тоймч Жан Мессиа “цагдаагийн албан хаагч ажлаа хийсний төлөө буруудсан” тул туслахыг хүмүүст уриалжээ.

Тэрбээр Францын хэт барууны үзэлт улс төрч Марин Ле Пэний зөвлөхөөр ажиллаж байсан хүн юм.

Харин зүүн жигүүрийн улс төрчид цагдаад зориулсан хандивын аяныг ”ичмээр үйлдэл” гэж үзэж байна.

Тухайлбал хэт зүүний үзэлт парламентын гишүүн Матильда Пано “2023 оны Франц улсад Умард Африк гаралтай залууг алах нь маш их мөнгө олох арга болсонд харамсаж байна” гэж сошиал хуудсандаа шүүмжлэн бичжээ.

Эх сурвалж: AFP