Гүрж улсын ерөнхийлөгч асан Михайл Саакашвили олон сарын дараа маш их турж эцсэн байдалтай олон нийтийн өмнө ил гарсан байна.
55 настай тэрбээр өчигдөр албан тушаалаа хэтрүүлэн ашигласан хэргийн шүүх хуралдаанд видео холбоогоор оролцсон юм.
“Ямар ч буруугүй хүн хоригдож байна. Би ямар ч гэмт хэрэг үйлдээгүй” гэж ярьсан тэрбээр цамцаа сөхөн яс арьс болсон биеэ харуулж байжээ.
Өнгөрсөн онд Саакашвили шоронд 50 хоног өлсгөлөн зарласны дараа ердийн эмнэлэгт эмчлүүлж эхэлсэн юм.
“Шоронд хорьсноор намайг мохоож чадахгүй. Би Гүржийн улс төрд идэвхтэй оролцсон хэвээр байна” гэж тэр шүүх хурлын үеэр хэлжээ.
Гүржийн эрх баригчид экс ерөнхийлөгчийнхөө эрүүл мэндэд зохих анхаарал тавьж байгаа гэдэг. Харин зарим эмч мэргэжилтнүүд Саакашвилигийн эрүүл мэндийн байдалд онцгой анхаарал тавихгүй бол амиа алдаж болзошгүй гэж анхааруулдаг юм.
Михайл Саакашвили 2004-2013 онуудад Гүржийн ерөнхийлөгчөөр сонгогдон ажиллаж байв. 2019 онд Украины иргэн болсон тэрбээр сүүлд эх орондоо буцаж ирээд авлига, албан тушаалын хэргээр баривчлагдсан юм.
Зарим хүний эрхийн байгууллагууд түүнд тулгасан хэргийг улс төрийн зорилготой гэж үздэг.
Саакашвилигийн дүрс олон нийтийн сүлжээнд цацагдсаны дараа Украины ерөнхийлөгч Володимир Зеленский түүний амь насыг аврахыг Гүржийн эрх баригчдад уриалж, Киев дэх Гүржийн элчин сайдад эсэргүүцэл илэрхийлэх болсноо мэдэгджээ.
Мөн Саакашвилийг даруй Украины, эсвэл Өрнөдийн эмнэлгүүдэд явуулж эмчлүүлэх хүсэлтэй байгаагаа илэрхийлсэн байна.
Дараа нь Украины гадаад хэргийн сайд Дмитро Кулеба өөрийн улсад суугаа Гүржийн элчин сайдыг Мягмар гарагт хүлээж авч уулзах болсноо мэдээлжээ.
Зеленский мэдэгдэлдээ Саакашвилийг Кремлийн захиалгаар “алж буй” Гүржийн эрх баригчдыг шүүмжилсэн байна. Оросын эзлэн түрэмгийллийн эсрэг 16 сарын турш тэмцэж байгаа Киевийн эрх баригчид сүүлийн үед Гүржийн засгийн газрыг илт Москвагийн талыг баримтлах болсон хэмээн шүүмжилдэг юм.
Эх сурвалж: AFP
