Өнгөрсөн долоо хоногийн Даваа гарагт Хар тэнгисийн замаар үр тариа экспортлох гэрээнээс Орос улс гарсан билээ.
Үүний дараа тус улсын арми Украины үр тарианы гол боомт хот Одессаг өдөр алгасалгүй бөмбөгдөж эхэлсэн юм.
Ням гарагийн шөнө болсон ээлжит агаарын цохилтын үеэр нэг хүн алагдаж, 22 хүн шархадсаны дотор хүүхдүүд байжээ.
Оросын пуужинд бас Одесса хотын үнэн алдартны шашны Спасо-Преображенскийн сүм оногдож, ноцтой гэмтсэн байна.
ЮНЕСКО-гийн хамгаалалтад байдаг уг сүмийг 18 дугаар зуунд анх байгуулж байжээ. 1936 онд Иосиф Сталиний тушаалаар нураасан сүмийг 2000-аад оны үеэс сэргээн засварласан юм байна.
Спасо-Преображенскийн сүмийг 2010 онд бүх Оросын үнэн алдартны шашны тэргүүн, патриарх Кирилл адисалж байжээ.
Сүмээс гадна Одесса хотын зургаан орон сууц пуужингийн цохилтод өртсөнийг орон нутгийн захирагч Олег Кипер мэдээлсэн байна.
Оросын талаас Искандер, Калибр, Оникс зэрэг таван төрлийн 19 пуужин харвасны заримыг Украины арми устгаж чаджээ.
“Одесса хотыг чиглэсэн Оросын пуужингийн довтолгооны гол зорилго нь Украины улсын Хар тэнгисээс таслах, үр тарианы экспортыг сэргээх олон улсын хүчин чармайлтад саад учруулах, айлган сүрдүүлэх юм” гэж Украины үндэсний аюулгүй байдлын зөвлөлийн нарийн бичгийн дарга Олексий Данилов сошиал хуудсандаа бичжээ.
Эх сурвалж: Reuters
