Канадын ерөнхий сайд Жастин Трюдо гэргий Софитойгоо 18 жил хамт амьдарсны эцэст салж байгаагаа өчигдөр зарласан байна.

Одоо 51 настай Трюдо, 48 настай Софи Грегуар-Трюдо нар 2005 оны тавдугаар сард гэрлэж байжээ.

Тэд гурван хүүхэдтэй болсны ууган нь 15 настай юм.

Трюдогийн хувьд гэр бүлийн гашуун түүх нь давтагдаж байна. Түүний эцэг Пьер Трюдо 1977 онд мөн Канадын ерөнхий сайд байхдаа гэргий Маргаретаас салж байжээ.

Жастин Трюдог 2015 онд 43 насандаа ерөнхий сайд болоход тэдний гэр бүл дэлхийн хэвлэл мэдээллийн хэрэгслүүдийн анхаарлын төвд байв.

Тухайлбал 2016 оны нэгдүгээр сарын дугаартаа Vogue сэтгүүл тэдний тэврэлдэж буйг харуулсан гэрэл зургуудыг дэлгэрэнгүй танилцуулгын хамт нийтэлж байжээ.

Трюдогийн ерөнхий сайдын албыг хашсан эхний жилүүдэд хос хоёр олон нийтийн өмнө байнга ил гарч, хурц тод өнгийн хувцаслалтаараа онцгойрдог байв.

Гэхдээ тэр хамтын амьдрал нь сорилт бэрхшээлтэй тулгардгийг хүмүүсээс нуудаггүй байжээ.

Бүр ерөнхий сайд болохоосоо өмнө 2014 онд Трюдо “бидний гэрлэлт төгс биш, бидэнд өгсөж уруудах бэрхшээлтэй зүйлс тохиолддог” гэж Канадын CBC телевизээр ярьж байлаа.

Сүүлийн жилүүдэд Софи нөхөртэйгөө хамт олон нийтийн өмнө ил гарах нь цөөрсөн бөгөөд тэдний харилцаанд асуудал байгаа нь тодорхой харагдаж байв.

Өнгөрсөн онд гэрлэлтийнхээ ойн өдөр Софи “Бид нарлаг болон салхи шуургатай өдрүүдийг хамтдаа туулсаар ирсэн хэдий ч энэ нь дуусах болоогүй байна” гэж сошиал хуудсандаа бичиж байжээ.

Жастин, Софи нар хамгийн сүүлд Чарльз хааны титмийн ёслолд оролцохоор тавдугаар сард хамтдаа Лондонд айлчилж байлаа.

Даваа гарагт хэвлэлийн хуралд оролцсоноосоо хойш Трюдо сүүлийн хоёр өдөр олны нүдний өмнө ил гараагүй юм.

“Софи бид хоёр утга учиртай, хүнд хэцүү яриа өрнүүлсний эцэст салах шийдвэр гаргаснаа та бүхэнтэй хуваалцахыг хүсэж байна” гэж өчигдөр Трюдо сошиал хуудсандаа бичжээ. Софи ч бас бараг адил утгатай мэдэгдлийг Инстаграм хуудсандаа бичсэн байна.

“Гэрлэлтээ салгахтай холбоотой бүх алхмыг хуулийн дагуу хийхээр ажиллаж байгаа. Тэдний гэр бүл цаашид ойр дотно хэвээр байх бөгөөд ерөнхий сайд, Софи нар хүүхдүүдээ аюулгүй, хайраар дутаахгүй орчинд өсгөхөд анхаарал тавьж байна. Ерөнхий сайд ирэх долоо хоногоос эхлэн гэр бүлийн хамт амрах болно” гэж Канадын ерөнхий сайдын албанаас мэдэгджээ.

Эх сурвалж: Reuters