Ерөнхийлөгч Володимир Зеленскийн амь насанд халдах оролдлогыг таслан зогсоож, түүний байрлалын мэдээллийг Оросын талд дамжуулах гэж байсан эмэгтэйг баривчилснаа Украины аюулаас хамгаалах алба өчигдөр зарлажээ.
Зеленскийг саяхан тус улсын өмнөд бүсийн Миколаев мужид ажиллах үеэр Оросын тал агаарын цохилтоор устгах төлөвлөгөөтэй байсан гэнэ.
Баривчлагдсан эмэгтэй ерөнхийлөгчийн явах зам, цаг хугацааны мэдээллийг Оросын талд дамжуулахаар ажиллаж байжээ.
Гэвч Украины аюулаас хамгаалах алба энэ талаар урьдчилж мэдээд сэргийлэх арга хэмжээ авсан байна.
Мэдээлэгч эмэгтэй бас Украины цахим дайны удирдлагын систем, зэвсгийн агуулах зэргийн байрлалыг олж авахаар ажиллаж байсныг илрүүлсэн гэнэ.
Украины аюулаас хамгаалах алба мэдээлэгч болон түүнтэй харилцагчийн хооронд солилцож байсан мессэжүүдийг өчигдөр үзүүлжээ.
Даваа гарагт мэдээлэгч эмэгтэйг баривчилсан бөгөөд тэр эх орноосоо урвасан хэрэгт буруутгагдвал 12 хүртэл жил шоронд хоригдох юм байна.
Түүнийг Миколаев мужийн Очаков хотын оршин суугч, цэргийн хуарангийн дэлгүүрт худалдагчаар ажиллаж байсан хүн гэж Украины тал мэдээлжээ.
Зеленский хамгийн сүүлд долдугаар сарын сүүлээр Миколаевт очиж байсан юм.
Түүний амийг хөнөөх гурван ч удаагийн оролдлого өмнө нь гарч байсан тухай өрнөдийн зарим хэвлэл мэдээлсэн байдаг.
Биедээ үргэлж гар буутай явдаг, ажлын байранд нь халдлага гарвал үхэх хүртлээ тулалдах бэлтгэлтэй байдгийг Зеленский өмнө нь хэвлэлд ярьж байжээ.
Тэрбээр дайн эхэлснээс хойш олон удаа фронтын шугамд очиж байсан юм.
Украины албаны эх сурвалжууд түүнийг буцсаны дараа л хаана очсон талаар нь нийтэд мэдээлдэг байна. Саяхан Украины албаныхан Зеленскийг алагдсан тохиолдолд хэрхэн ажиллах, хэнээр орлуулах тухай нууц төлөвлөгөө бэлэн байдгийг Politico сайтад ярьж байжээ.
Эх сурвалж: Business Insider