Бельгийн армийн зэвсэглэлд байсан 49 ширхэг Leopard 1 загварын танкийг Европын Холбооны нэг улс Украинд илгээхээр худалдаж авсныг холбогдох эх сурвалж өчигдөр мэдээлжээ.
Тодруулбал зэвсгийн бизнес эрхлэгч OIP Lans Systems хувийн компанийн гүйцэтгэх захирал Фрэдди Верслуйс уг наймааг хийснээ мэдээлсэн ч гэрээний нууцлалын заалтын дагуу худалдан авагчийн нэрийг болон ямар үнээр зарснаа зарлаагүй байна.
Верслуйс 2014 онд Бельгийн засгийн газраас Германд үйлдвэрлэсэн 50 ширхэг Leopard 1 танкийг нэг бүрийг нь 37,000 еврогоор худалдан авч байжээ. Тухайн үед Өрнөдийн ихэнх орнууд батлан хамгаалах зардлаа танаж, зарим зэвсэг техникээ зарж байсан юм байна.
Дээрх танкуудыг ойрын зургаан сарын дотор засварлаж, сэлбээд Украины фронтод хүргэх боломжтойг Верслуйс мэдээлжээ.
Зарим эх сурвалжуудын мэдээлснээр танкуудыг худалдан авагч нь Германы зэвсгийн томоохон үйлдвэрлэгч Rheinmetall байж болзошгүй гэнэ.
Энэ худалдан авалтын талаар тус компани болон Германы засгийн газар ямар нэг мэдээлэл өгөөгүй байна.
“Бидний хэлсэн үнийг хэн нэгэн хүлээн зөвшөөрсөн учраас л танкуудаа зарсан гэсэн үг. Эцэст нь тэдгээрийг эрх чөлөөний төлөө тулаанд илгээх болсондоо би баяртай байна” гэж Верслуйс сошиал хуудсандаа бичжээ.
Энэ оны эхээр Өрнөдийн хэд хэдэн орон өөрийн зэвсэглэлд байгаа Германд үйлдвэрлэгдсэн Leopard 2 танкийг Украинд илгээх шийдвэр гаргаж байв. Мөн өмнөх загвар болох Leopard 1 загварыг бас илгээхээр болсон юм.
Leopard 1 загварыг 1960-аад оны үед анх зохион бүтээсэн бөгөөд шинэ Leopard 2 загвартайгаа харьцуулахад илүү хөнгөн, хүч багатай байдаг.
Өрнөдийн орнууд Украинд илгээх тусламжийн зэвсэг техникийг бүрдүүлэхийн тулд хувийн компаниудаас ч худалдан авч байгаа нь эндээс харагдаж байна.
Их Британийн засгийн газар өмнө нь Верслуйсийн компаниас 46 ширхэг M113 хөнгөн хуягт машиныг худалдан авч, Украинд илгээж байжээ.
Эх сурвалж: Reuters
