Даваа гарагт ОХУ-ын засгийн газар энэ хичээлийн жилээс сургалтад нэвтрүүлэх түүхийн шинэ сурах бичгийг танилцуулжээ.
Ахлах ангийн энэхүү сурах бичгийг зохиоход таван сарын хугацаа зарцуулсныг тус улсын боловсролын сайд Сергей Кравцов танилцуулгын үеэр мэдээлсэн байна.
Шинэ сурах бичигт 1945 оноос хойш өнөөдрийг хүртэлх түүхийг шинэчлэн бичжээ.
Украинд явуулж буй “цэргийн тусгай ажиллагаа”-ны талаар үнэн зөв мэдээллийг өсвөр насныханд өгөх зорилгоор шинэ сурах бичиг гаргасныг Кравцов онцолсон байна.
“Украин дахь цэргийн тусгай ажиллагаа дуусаж, ялалт байгуулсны дараа ч энэ сурах бичгийг үргэлжлүүлэн хэвлэх болно” гэж сайд тайлбарлажээ.
Эх сурвалжуудын мэдээлснээр шинэ сурах бичигт Украины дайн эхлэх болсон шалтгааныг ерөнхийлөгч Путиний эшлэлийг оруулан тайлбарласан байна.
Тухайлбал Өрнөдийнхний шахалтаар Украин улс хөрш улс орнууддаа дайсагнах болсон, Украин бол “зохиомол улс”, Орос улс оршин тогтнолынхоо төлөө дайтаж буй зэрэг үг хэллэгийг оруулжээ.
Бас 2014 онд “Нацист дэглэм” тогтож байсан Крымийн хойгийг Оросын цэргүүд “чөлөөлсөн”, Украины эзлэгдсэн хэсгийг ОХУ-ын “шинэ нутаг дэвсгэр” зэргээр тайлбарласан байгаа гэнэ.
Эх сурвалж: Business Insider
