Бямба гарагт Крымийн гүүр болон Крымийн бусад хэд хэдэн хэсэгт Украины тал агаараас довтолсныг ямар нэг хохиролгүй таслан зогсоосноо ОХУ-ын батлан хамгаалах яам мэдээлжээ.
Тухайлбал Украины арми тус хойгийг Оросын эх газартай холбодог Керчийн гүүрийг С-200 пуужингаар харвасан нь амжилтгүй болсон тухай мэдээлсэн байна.
Бямба гарагт агаарын довтолгооны улмаас уг гүүрний хөдөлгөөн хоёр ч удаа түр хугацаагаар хаагдсан юм.
“Украины пуужингуудыг Оросын агаарын довтолгооноос хамгаалах систем цаг тухайд нь илрүүлж, замд нь устгасан. Ямар нэг хохирол учраагүй” гэж батлан хамгаалах яам мэдэгджээ.
Үүнээс өмнө Москвагаас томилогдсон Крымийн захирагч Сергей Аксёнов гүүрний ойролцоо хоёр пуужинг устгасан тухай Телеграм хуудсандаа бичсэн юм. Дараа нь гурав дахь довтолгоо мөн амжилтгүй болсныг баталжээ.
“Манай агаарын довтолгооноос хамгаалах хүчний мэргэжлийн өндөр ур чадвар, сонор сэрэмжтэй байдалд талархаж байна” гэж Аксёнов бичсэн байна.
Өчигдөр Оросын сошиал ертөнцөд утаанд автсан гүүрний зураг, бичлэгүүд олноор нийтлэгдэж байв.
Уламжлал ёсоор Украины талаас дээрх довтолгооны талаар байр суурь илэрхийлээгүй байна.
ОХУ-ын гадаад хэргийн яамны хэвлэлийн төлөөлөгч Мария Захарова “Ийм зэрлэг балмад үйлдлийг зөвтгөх ямар ч аргагүй. Тэд хариуг нь амсах болно” гээд иргэний байгууламжид халдсан хэмээн Украины талыг шүүмжилжээ.
Өчигдөр бас Крымийн хойгийн олон хэсэгт Украины 20 нисгэгчгүй онгоцыг устгаснаа ОХУ-ын батлан хамгаалах яам тусад нь мэдээлсэн юм.
Тэдгээрийн 14-ийг нь агаарт устгаж, зургааг нь жолоодлогогүй болгон унагасан гэнэ. Дроны халдлагын улмаас ямар ч хохирол учраагүй гэж бас мэдээлжээ.
Өчигдөр бас Калининград мужид сургуулилалтын нислэг үйлдэж байсан Оросын армийн Су-30 сөнөөгч онгоц осолдож, хоёр нисгэгч нь амь үрэгдсэн юм.
Албаныхан ослын шалтгааныг техникийн доголдолтой холбон тайлбарлажээ.
Калининград бол ОХУ-ын үндсэн газар нутгаас Балтийн тэнгис болон хуурай газраар таслагдсан муж юм. Тус муж Беларусиас гадна НАТО-гийн гишүүн Польш, Литва улсуудтай хил залгадаг.
Эх сурвалж: Reuters
