Лахайна хот түймэрт бараг бүрэн сүйрчээ.
Түймэр гарсан Хавайн Мауи арал бол аялал жуулчлалын алдартай газар юм. Одоогоор түймрийн улмаас 89 хүн амиа алдсаныг Хавайн эрх баригчид баталжээ. Түүнчлэн олон зуун хүнтэй холбоо тогтоогдоогүй байгаа тул амиа алдагсдын тоо нэмэгдэж магадгүй байна. Мөн мянга орчим хүн сураггүй байгаа гэсэн мэдээлэл байна. Тиймээс амь үрэгдэгсдийн тоо цаашид ч нэмэгдэнэ гэжээ.
Гал сөнөөгчид хэд хэдэн газарт түймрийг унтрааж байгаа бөгөөд түүний дотор түүхэн хот болох Лахайна бараг бүрэн сүйрсэн байна. Өмнө нь энэ хотод жилд хоёр сая орчим жуулчин ирдэг байсан юм.
19-р зуунд Лахайна хот нь АНУ-д нэгдэхээс өмнө Хавайн вант улсын нийслэл байв.
Хавайн арлуудад гал түймэр долоо хоногийн дундуур эхэлсэн бөгөөд энэ нь хэт халуун, хуурайшилтаас үүдэлтэй байв. Түймэр Дора хар салхины улмаас маш хурдацтай тархсан байна.
Хавайд дахь ой хээрийн түймэр гарах нь Калифорниа болон АНУ-ын эх газрын бусад мужаас харьцангуй бага байдаг. Нутгийн иргэд ийм зүйл хэзээ ч харж байгаагүй гэж мэдэгджээ.
Хавайн Ерөнхий прокурор ой хээрийн түймрийн эсрэг эрх баригчид зохих арга хэмжээ авсан эсэхийг сайтар нягтлах бодолтой байгаагаа мэдэгдэв. Мөн орон нутгийн оршин суугчдад аюулын талаар хэр хурдан анхааруулсан бэ гэсэн асуулт улам бүр нэмэгдсээр байна.
Нутгийн иргэдийн нэг, 26 настай Брайан Агиран гал гарсан хамгийн хүнд мөчид Лахайна хотод үлдэж байшингийнхаа галыг унтрааж чадсан ч тэр буцаж очихыг хүсэхгүй байна. Тэрбээр "Одоо Лахайна үүрд өөрчлөгдсөн." гэжээ.
Арлын баруун хэсэг өнөөг хүртэл цахилгаан, усгүй хэвээр байна. Эрлийн багийнхан хохирогчдыг эрэн хайсаар байгаа.
Эргийн хамгаалалтын албаныхан хотын боомтын ойролцоох уснаас 17 хүнийг аварсан гэж мэдэгдэв. Тэдний биеийн байдал тогтвортой байна.
Түймэрт өртсөн хотуудыг сэргээн босгоход олон жил шаардлагатайг эрх баригчид анхаарууллаа. Зөвхөн Лахайна хотод гэхэд л мянга гаруй барилга нурсан байна.
Эх сурвалж: ВВС news
