Вьетнамын цахилгаан хөдөлгүүрт автомашин үйлдвэрлэгч VinFast компани саяхан Black Spade Acquisition Co (SPAC-special purpose acquisition company) компанитай нэгдсэнийхээ дараа хувьцаагаа Нью-Йоркийн хөрөнгийн биржид арилжаалж эхэлжээ.

Арилжааны эхний өдөр тус компанийн хувьцааны ханш 270 хувиар өссөн байна. Тухайлбал нэгж хувьцааны анхны үнэ $10 байсан бол арилжаа нээгдэхэд $22 хүрч, цааш өссөөр $37 хүрч хаагджээ.

Ингэснээр VinFast компанийн зах зээлийн үнэлгээ $85 тэрбумд хүрч, Volkswagen, Ford зэрэг томоохон үйлдвэрлэгчдийн үнэлгээг давсан байна.

Эдгээр компаниудын зах зээлийн үнэлгээ сүүлийн байдлаар тус бүр $69.7 тэрбум, $48 тэрбум орчим байгаа юм.

Гэхдээ энэ өсөлт нь тус компанийн боломж асар их байгааг харуулж байна.

Учир нь VinFast-ийн 99 хувийг Вьетнамын тэргүүн баян Пам Нат Вуонг эзэмшдэг бөгөөд хувьцааныхаа багахан хэсгийг олон нийтэд санал болгосон нь энэ юм.

Мягмар гарагийн арилжааны дараа түүний хөрөнгийн хэмжээ $39 тэрбумаар өсөж, $44.3 тэрбумд хүрснийг Блүүмбэрг агентлаг мэдээлжээ.

VinFast компанийг Вьетнамын томоохон бизнесийн бүлэглэл Vingroup 2017 онд байгуулж байв. Тус компани цахилгаан хөдөлгүүрт автомашин, автобус, скүүтер зэргийг Вьетнам болон Умард Америкийн зах зээлд нийлүүлдэг.

VinFast АНУ-ын хөрөнгийн зах зээлд гарсан Вьетнамын компаниудаас зах зээлийн үнэлгээгээр хамгийн том нь болж байна.

Гэхдээ хувьцааны ханшийн энэ өсөлт нь VinFast-ийн бизнес амжилттай болох баталгаа биш юм. Тус компани одоогоор дөрвөн загварын цахилгаан автомашин үйлдвэрлэж, нийтдээ 19,000 орчмыг зах зээлд нийлүүлээд байгаа.

Харьцуулбал 2023 оны эхний хагаст Volkswagen 4.4 сая автомашин борлуулсны 321,000 нь цахилгаан хөдөлгүүртэй байжээ.

VinFast бүтээгдэхүүнээ энэ оны эхээр АНУ-ын зах зээлд гаргаж эхэлсэн бөгөөд одоогоор хэрэглэгчдийн өгсөн үнэлгээ сайнгүй байна.

Эх сурвалж: CNN