АНУ-ын эрх баригчид зөвшөөрөл өгсний дараа Нидерланд, Дани улсууд нийтдээ 61 ширхэг F-16 сөнөөгч онгоцыг Украинд хандивлахаар болжээ.
Амралтын өдрүүдэд дээрх улсуудад айлчилсан Украины ерөнхийлөгч Володимир Зеленский шийдвэрийг талархан хүлээж авч буйгаа илэрхийлсэн юм.
Дани улс 19 онгоц нийлүүлэх ба эхний зургааг нь шинэ жилийн үеэр, найман ширхгийг ирэх онд, үлдсэн тавыг 2025 онд Украинд илгээхээр болсныг тус улсын ерөнхий сайд Метте Фредериксен өчигдөр мэдэгджээ.
“Танай улсын эрх чөлөөний төлөө тэмцлийг Дани улс тууштай дэмжиж буйн илрэл гэж энэ хандивыг ойлгоорой” хэмээн Фредериксен хэлсэн юм.
Нидерланд улсын хувьд өөрийн зэвсэглэлд ашиглаж буй 42 ширхэг F-16 онгоцыг Украинд хандивлахаар болжээ. Тус улс эдгээр онгоцнуудаа сүүлийн үеийн F-35 загваруудаар сольж байгаа юм.
F-16, F-35 загварын сөнөөгч онгоцнуудыг АНУ-ын Lockheed Martin компанид үйлдвэрлэдэг.
Хэвлэлийн хурлын үеэр Нидерландын ерөнхий сайд Марк Рутте, Украины ерөнхийлөгч Володимир Зеленский нар хандивын сөнөөгч онгоцнуудтай танилцсан байна.
“Украины нисгэгчид, инженерүүд сургалтад хамрагдаж дууссаны дараа нийлүүлэх F-16 сөнөөгч онгоцны тоог Марк Рутте бид хоёр ярилцаж тохиролцлоо. Нийт 42 онгоц. Энэ бол зөвхөн эхлэл юм” гэж Зеленский энэ үеэр хэлжээ.
Хандивын нисэх онгоцнуудыг Украины мэргэжилтнүүд сургалтаа дуусгах хүртэл Украинд илгээхгүй юм байна. Нисгэгчийн ур чадварын сургалт зургаан сар үргэлжлэх бол техникийн стандарт англи хэлний сургалт дөрвөн сар үргэлжлэх гэнэ.
Өөрөөр хэлбэл F-16 сөнөөгч онгоцнууд 2024 оноос наана тулаанд орохгүй.
Украины агаарын флот Зөвлөлтийн үеийн хуучин загварын нисэх онгоцнуудаас бүрддэг. Орос, Украины талуудын аль аль нь энэ дайнд нисэх хүчнээ төдийлөн ашиглалгүй, нөөцөлж байгаа.
Хэрвээ агаарын тулаан бодитой эхэлбэл Оросын арми хүчээр илүүрхэх нь тодорхой юм.
Эх сурвалж: The Guardian
