Гацуурт ХХК-ийн захирал Л.Чинбат нь бусдыг авто машинаар хөөсөн, дайрахыг завдсан гэх хэргийг Цагдаагийн байгууллага шалгаж дуусаад шүүхэд шилжүүлэх саналтайгаар прокурорт хүргүүлсэн хэмээн хамгийн сүүлд буюу өнгөрсөн долдугаар сард мэдээлж байв.

Тэдэнд холбогдох хэргийг хуулийн байгууллага хэрхэн шийдвэрлэх нь олон нийтийн анхаарлын төвд байна.

Уг хэргийг шийдвэрлэх явцын талаар эх сурвалжийн мэдээлснээр хэргийн оролцогч нараас хүсэлт гаргасан тул Л.Чинбат нарт холбогдох хэргийг нэмэлт мөрдөн байцаалт хийлгэхээр цагдаагийн байгууллагад буцаажээ. Хэргийн оролцогч нарын гаргасан хүсэлтийг нэмэлт мөрдөн байцаалт хийж байж шийдвэрлэх юм байна.

Сэлэнгэ аймгийн прокурорын газраас "Гацуурт" ХХК-ийн захирал Л.Чинбатыг "хүнийг алахыг завдсан", "хүний нэр төр, алдар хүндэд халдсан илт худал мэдээллийг олон нийтэд тараасан" гэх хэрэгт, тухайн газарт байсан нутгийн иргэд болох М, Б нарыг "Мөрдөн шалгах ажиллагааны явцад хохирогчоор зориуд худал мэдүүлэг өгсөн" гэх гэмт хэрэгт, Сэлэнгэ аймгийн Цагааннуур сумын гуравдугаар багийн Засаг дарга Г-г "Хохирогчийг зориуд худал мэдүүлэг өгүүлэхээр ятгаж, хохирогчид хууль бусаар нөлөөлсөн", "бусдын эрүүл мэндэд хөнгөн хохирол санаатай учруулсан" гэмт хэрэгт холбогдуулан тус тус яллагдагчаар татаж, цагдаагийн байгууллага мөрдөн байцаалтын ажиллагаа явуулсан болохыг мэдэгдэж байсан юм.