Украины арми Запорожийн фронтын чиглэлд амжилттай давшиж, чухал суурин газрыг чөлөөлснөө өчигдөр зарлажээ.

Орехов хотоос өмнө зүгт оршдог Роботине тосгоныг чөлөөлснөөр Украины арми Крымийн хойгтой холбогдох хуурай газрын замыг хамгаалж буй Оросын армийн гол шугамд хүрч байгааг тус улсын батлан хамгаалахын дэд сайд Ханна Маляр өчигдөр өглөө мэдээлсэн байна.

Цаашлаад Мелитополь, Бердянск чиглэлд давшиж, Азовын тэнгисийн эрэгт хүрэх дараагийн тулаан эхлэхэд бэлэн болж байгаа юм. Эдгээр хотуудыг чөлөөлбөл Крымийн хойг бусад эзлэгдсэн нутаг дэвсгэрээс хуурай газраар таслагдана.

Украины армийн сөрөг давшилт зургаадугаар сарын эхээр эхэлж, аажим аажмаар урагшилсаар байна.

Оросын тал Украины сөрөг давшилтыг хориглох бэлтгэлийг олон сарын турш хийж, асар уудам газар нутгийг минажуулаад байгаа. Украины зэвсэгт хүчин одоо минажуулсан талбайг цэвэрлэхэд гол хүчээ дайчилж байна.

“Сөрөг давшилтын ахиц манай анх төлөвлөсөн болон манай холбоотнуудын хүсэж байгаа шиг хурдан биш байгаа. Гэхдээ бид алхам алхмаар урагшилсаар байна” гэж Украины үндэсний аюулгүй байдлын зөвлөлийн нарийн бичгийн дарга Олексий Данилов саяхан ярьсан юм.

Фронтын зарим хэсэгт минажуулалтын нягт маш өндөр, 4-5 м.кв талбай тутамд нэг байгааг тэр хэлсэн байна.

Киевийн эрх баригчид Өрнөдийн орнуудаас мина цэвэрлэх нэмэлт төхөөрөмжөөр туслахыг хүссэн нь түрүүчээсээ хэрэгжиж эхэлжээ. Хамгийн сүүлд Норвеги улс ийм төхөөрөмж авахад шаардлагатай санхүүжилтээр туслахаа мэдэгдсэн юм.

Украины арми сөрөг давшилтаа зүүн болон өмнөд фронт дээр зэрэг явуулж байгааг өөрчилж, хүчээ тарамдахгүй байхыг Өрнөдийн холбоотнууд энэ сарын эхээр болсон уулзалтын үеэр зөвлөсөн тухай эх сурвалжууд мэдээлж байгаа.

Зүүн фронтын гол давшилт Бахмут хотын чиглэдэг. Өрнөдийн цэргийн мэргэжилтнүүд агаарын хүчний томоохон дэмжлэггүйгээр өргөн фронтоор давших хэцүү гэж үзэж байгаа юм.

Энэ зөвлөмжийн дагуу сарын дундаас эхлэн Украины тал өмнөд фронтын чиглэлд хүчээ төвлөрүүлж, Оросын цэрэгт эзлэгдсэн газар нутгаа голоор нь хуваах зорилт тавьсан байна.

Өнгөрсөн долоо хоногт АНУ-ын зэвсэгт хүчний жанжин штабын дарга, генерал Марк Милли хэвлэлд өгсөн ярилцлагадаа Украины арми өмнөд фронт дээр Оросын хамгаалалтын нэгдүгээр шугамд хүрч, өдөрт 500 метрээс 1 км хүртэл зайд урагшилж байгааг мэдээлжээ.

“Украины армид тулалдах хангалттай хэмжээний нөөц хүч бий. Үүнийгээ гүйцэд ашиглаагүй байгаа. Тиймээс бид сөрөг давшилт амжилттай эсвэл амжилтгүй байгаа талаар дүгнэж хэлэхэд хэтэрхий эрт байна. Гэхдээ өнөөдрийг хүртэл тодорхой ахиц дэвшил гарсан нь тодорхой харагдаж байгаа” гэж тэр ярьсан юм.

Эх сурвалж: The Guardian