Армени улс аюулгүй байдлаа дан ганц ОХУ-д даатгасан нь “стратегийн алдаа” байсан тухай тус улсын ерөнхий сайд ярьжээ.
Италийн La Republica сонинд өгсөн Арменийн ерөнхий сайд Никол Пашиняны ярилцлага Ням гараг нийтлэгдсэн байна.
Тэрбээр уг ярилцлагадаа хөрш Азербайжаны түрэмгийллээс Уулын Карабахын бүс нутгийг хамгаалж чадахгүй байгаа Орос улсыг шүүмжилжээ.
“Армени улсын аюулгүй байдлын архитектур 99.999 хувь Оросоос хамааралтай. Бид бүх зэвсэг, сум хэрэгслээ Оросоос авдаг. Гэвч өнөөдөр Орос улс өөрөө зэвсэг, сум хэрэгслээр дутаж, хүсэл байсан ч Арменийг хамгаалж чадахгүй болсон нь тодорхой харагдаж байна. Аюулгүй байдлын асуудлаа цор ганц холбоотонд даатгах нь стратегийн алдаа болдгийг энэ жишээ бидэнд харууллаа гэж Пашинян ярьсан байна.
Энэ байдлаараа Орос улс Өвөр Кавказын бүс нутгийг орхиж магадгүйг тэр бас хэлжээ.
Хөрш Азербайжантай газар нутгийн маргаанаа шийдвэрлэхийн тулд Арменийн эрх баригчид сүүлийн үед Европын Холбоо, АНУ-тай идэвхтэй харилцах болсон юм.
Одоогоор Пашиняны ярилцлагатай холбоотойгоор Оросын талаас ямар нэг байр суурь илэрхийлээгүй байна.
Өмнө нь ийм шүүмжлэл яригдахад Москвагийн эрх баригчид өөрийн бодлого, үйл ажиллагааг хамгаалж, Украины дайнтай холбоотойгоор Өвөр Кавказын асуудлыг анхаарлаасаа холдуулсан гэх санааг няцааж байсан юм.
Уулын Карабах нь олон улсын хүлээн зөвшөөрснөөр бол Азербайжаны нутаг дэвсгэр. Гэхдээ тус бүс нутгийн 120,000 орчим оршин суугчдын дийлэнх хэсэг нь армени үндэстэн юм.
1990-ээд оны эхнээс салан тусгаарлагчид Уулын Карабахт хяналтаа тогтоож, Бакуд захирагдахаа больсон.
2020 онд Армени, Азербайжан улсууд энэ бүс нутгийн төлөө дайтсан бөгөөд Оросын зуучлалтай гал зогсоох гэрээгээр дайнаа зогсоосон юм.
Гэхдээ тэр үеэс хойш Орос улс энхийг сахиулах үүргээ хангалттай биелүүлж чадахгүй байгаагаас хэд хэдэн зэвсэгт мөргөлдөөн гарч байжээ.
Эх сурвалж: Reuters