Умард Солонгосын удирдагч Ким Жон Ун энэ сард ОХУ-д айлчилж, ерөнхийлөгч Путинтэй зэвсэг нийлүүлэх асуудлаар уулзах гэж буйг Нью Йорк Таймс сонин өчигдөр албаны эх сурвалжаас уламжлан мэдээлжээ.
Ким уламжлал ёсоор хуягт галт тэргээрээ ОХУ-ын Владивосток хотод хүрэлцэн очих гэнэ.
Долдугаар сард Пёньянд айлчлах үеэрээ ОХУ-ын батлан хамгаалах яамны сайд Сергей Шойгу зэвсэг нийлүүлэх асуудлыг хөндсөн гэх мэдээлэл бий.
Мөн хоёр улс хамтарсан цэргийн сургуулилалт зохион байгуулах асуудлыг хэлэлцэж эхэлсэн тухай эх сурвалжууд мэдээлж байгаа.
“Бид өмнө нь анхааруулж байсанчлан ОХУ, БНАСАУ-ын хооронд зэвсэг нийлүүлэх яриа хэлэлцээ идэвхтэй урагшилж байна” гэж Цагаан ордны үндэсний аюулгүй байдлын зөвлөлийн хэвлэлийн төлөөлөгч Адриен Уатсон тус сонинд ярьжээ.
Тэрбээр цааш нь хэлэхдээ “Ким Жон Ун энэ хэлэлцээг үргэлжлүүлж, удирдагчдын түвшинд хүргэх тухай мэдээлэл бидэнд байгаа” гэсэн юм.
Украинд дайн эхэлсэн цагаас хойш АНУ болон Европын холбоотнууд Умард Солонгосын дэглэм ОХУ-д зэвсэг нийлүүлж болзошгүйг олон удаа анхааруулж байв.
Хамгийн сүүлд наймдугаар сарын 30-нд Цагаан ордны үндэсний аюулгүй байдлын зөвлөлийн төлөөлөгч Жон Кирби хоёр орны хооронд зэвсэг нийлүүлэх хэлэлцээ идэвхтэй урагшилж буйд АНУ санаа зовж байгааг илэрхийлсэн юм.
Эх сурвалж: Reuters
