Украины дайнд Оросын өмнөөс байлдуулах зорилгоор иргэдийг нь элсүүлж байсан нууц сүлжээг илрүүлснээ Куба улсын гадаад явдлын яам өчигдөр мэдээлжээ.
Уг сүлжээ зөвхөн Кубын нутаг дэвсгэрт биш, бас ОХУ-ын нутаг дэвсгэрт амьдардаг Кубын иргэдийг элсүүлэх зорилготой ажиллаж байсныг мэдэгдэлд дурдсан байна.
Энэхүү сүлжээний эсрэг засгийн газар нь бүх хүчин чадлаа дайчлан ажиллаж буйг Кубын гадаад хэргийн сайд Бруно Родригес сошиал хуудсандаа мэдээлжээ.
“Куба улс бол Украины дайны нэг оролцогч биш. Кубын иргэдийг аль нэг улсын эсрэг зэвсэг бариулах зорилготой аливаа үйл ажиллагаанд оролцсон хэнтэй ч хатуу тэмцэх болно” гэж тус улсын гадаад хэргийн яам мэдэгдсэн байна.
Баасан гарагт АНУ-ын Майамид төвтэй “America TeVe” сонинд Украины эзлэгдсэн нутаг дэвсгэрт барилгын ажил хийх нэрээр хууртаж очсон өсвөр насны хоёр хүүгийн тухай мэдээлэл нийтлэгджээ.
Тэд Оросын Рязань хотоос Украины фронтод байлдахаар ачигдаж явах замдаа автобусанд хийсэн дүрс бичлэгээ тус сонинд илгээж, тусламж хүссэн юм байна.
Кубын өөр нэг иргэн ОХУ-ын иргэний паспорт авах зорилгоор цэрэгт элссэн тухайгаа тус сонинд бас мэдээлжээ. Кубын засгийн газрын мэдэгдэл дээрх тохиолдлуудтай холбоотой эсэх нь тодорхойгүй байна.
Сүүлийн жилүүдэд Орос, Кубын харилцаа өргөжиж байгаа. Өнгөрсөн оны сүүлээр Москвад айлчилсан Кубын ерөнхийлөгч Мигуэл Диаз-Канел ОХУ-ын ерөнхийлөгч Владимир Путинтэй уулзаж байв. Энэ оны зургаадугаар сард ОХУ-ын батлан хамгаалахын сайд Сергей Шойгу тус улсын батлан хамгаалахын сайд Алваро Лопез Миераг хүлээн авч уулзаж байжээ.
Эх сурвалж: AFP
