Японы Тоёота Мотор компани өчигдөр буюу Лхагва гарагт Century тансаг ангиллын бүтээгдэхүүний цувралдаа анхны SUV (Sport Utility Vehicle) загварыг нэмж байгааг зарлажээ.

Зөвхөн Plug-In Hybrid (гаднын цахилгаан эх үүсгүүрээр батарейг нь цэнэглэх боломжтой) хувилбартай байх Century SUV загварын үнэ 25 сая иенээс ($169,000) эхлэх юм байна.

Энэ нь одоо зах зээлд худалдаалагдаж буй Century седан загварын үнээс 5 сая иенээр ($34,000) өндөр гэсэн үг юм.

Тиймээс Century SUV нь Тоёота компанийн дотооддоо үйлдвэрлэдэг хамгийн өндөр үнэтэй автомашин болж байна.

Century седан загваруудыг Японы эзэн хааны гэр бүл, улс төрчид, том компанийн удирдлагууд голдуу ашигладаг.

Шинэ SUV загвар нь бүрэн налдаг арын суудал, сайжруулсан аудио систем, тав тухыг хангах зорилгоор 75 хэмийн өнцгөөр дэлгэгдэж нээгддэг арын хаалгатай болохыг Тоёота компани мэдээлжээ.

Century SUV загварын захиалгыг өчигдрөөс авч эхэлсэн бөгөөд энэ оны сүүлээр эхний худалдан авагчдад хүрч эхлэх гэнэ.

Шинэ загварыг сард 30 ширхгийг зах зээлд нийлүүлэхээр төлөвлөжээ.

Century брэндийг 1967 онд Тоёота компанийн үүсгэн байгуулагч Сакичи Тоёодагийн 100 насны ойг тохиолдуулан бий болгосон юм.

Тэр үеэс хойш энэ брэндийн 42,000 орчим автомашиныг зах зээлд борлуулсан байна.

SUV загварыг Японы төв бүсийн Айчи мужийн нутагт оршдог Тахарагийн үйлдвэрт угсарч, дотоод болон гадаад зах зээлд захиалгаар нийлүүлэх гэнэ.

Тоёотагийн энэ ангиллын өрсөлдөгчид болох Британийн Rolls Royce Motor Cars, Bentley компаниуд бас SUV загваруудаа зах зээлд гаргаад байгаа юм.

Эх сурвалж: Kyodo News