Армени улс ирэх долоо хоногт нутаг дэвсгэр дээрээ АНУ-тай хамтарсан цэргийн сургуулилалт зохион байгуулах гэж байна.
Есдүгээр сарын 11-20-ны өдрүүдэд үргэлжлэх “Eagle Partner 2023” сургуулилалт нь олон улсын энхийг сахиулах ажиллагаанд бэлдэх зорилготойг Армени улсын батлан хамгаалах яам тайлбарласан юм.
Арменийн талаас 175, АНУ-ын талаас 85 цэрэг оролцох энэ ажиллагаанд хүнд зэвсэг техник хэрэглэхгүй, зөвхөн гар зэвсэг ашиглах юм байна.
Энэ оны эхээр Армени улс Оросын тэргүүлдэг Хамтын Аюулгүй Байдлын Гэрээний Байгууллагын орнуудын цэргийн сургуулилалтыг нутаг дэвсгэр дээрээ зохион байгуулахаас татгалзсан юм.
Хэдийгээр энэ удаагийн сургуулилалт цар хүрээний хувьд жижиг ч Оросын эрх баригчдын санааг зовоож байна.
“Мэдээжийн хэрэг одоогийн нөхцөл байдалд ийм мэдээ бидний санааг зовоож байна. Тиймээс үүнд анхаарлаа хандуулж, нөхцөл байдлыг ажиглах болно” гэж Кремлийн хэвлэлийн төлөөлөгч Дмитрий Песков хоёр улсын хамтарсан сургуулилалтын талаар хэлжээ.
ОХУ нь Армени улсын нутагт цэргийн баазтай. 1991 оныг хүртэл Зөвлөлт Холбоот Улсын бүрэлдэхүүнд байсан Өвөр Кавказын бүс нутагт Оросын нөлөө, ашиг сонирхол өндөр байдаг.
Энэ бүс нутгийн Армени, Азербайжан улсуудын газар нутгийн маргаанд Москва зуучлагч, энхийг сахиулагчийн үүрэгтэй оролцдог юм.
Гэхдээ Украины дайны улмаас Оросын нөлөө өмнөхөөсөө суларч байгаа. Өнгөрсөн долоо хоногт Италийн сонинд өгсөн ярилцлагадаа Арменийн ерөнхий сайд Никол Пашинян аюулгүй байдлын асуудлаа дан ганц Орос улсад даатгасан нь “стратегийн алдаа” болсон тухай дурдаж байв.
Эх сурвалж: Aljazeera
