АНУ-ын төрийн нарийн бичгийн дарга Энтони Блинкен хоёр өдрийн хугацаатай Украины нийслэл Киевт айлчилсан юм.
Энэ үеэрээ тэр Украины гадаад хэргийн сайд Дмитро Кулебатай хамт Киев хот дахь McDonald’s түргэн хоолны ресторанд түр саатаж, шарсан төмс зоогложээ.
Дэлхийн хамгийн том түргэн хоолны рестораны сүлжээ Украины дайн эхэлсний дараа буюу 2022 оны гуравдугаар сард ОХУ, Украины зах зээлээс гарсан юм.
Орос дахь салбаруудаа нутгийн бизнесмэнд зарсан нь 2022 оны зургаадугаар сараас эхлэн шинэ брэндийн дор дахин нээгдэж байв.
Кулеба тухайн үед Блинкентэй утсаар ярихдаа Украинд McDonald’s-ийг дахин нээх нь ямар ач холбогдолтойг тайлбарлаж, дэмжлэг хүсэж байжээ.
“McDonald’s манайд байх нь итгэл найдварын бэлгэдэл гэж би үзэж байлаа. Тиймээс бид утсаар ярилцсаны дагуу буцаж нээгдсэн юм. Өнөөдөр бид хоёр энд байгаагийн учир шалтгаан энэ” гэж Кулеба ресторанд байхдаа сэтгүүлчдэд ярьсан байна.
Блинкений ятгалгаар түргэн хоолны сүлжээ 2022 оны есдүгээр сард буюу хаагдсанаасаа хойш хагас жил орчмын дараа Киев дэх салбаруудаа дахин нээж байжээ.
“Дараагийн удаа намайг Киевт очиход хамтдаа McDonald’s-д очно гэж бид тухайн үед тохиролцсон юм” гэж Блинкен сэтгүүлчдэд тайлбарласан байна.
Тэрбээр зургаадугаар сарын эхээр Украины армийн сөрөг давшилт эхэлснээс хойш Вашингтоноос Киевт айлчилсан анхны өндөр албан тушаалтан болж байгаа.
Блинкен айлчлалынхаа эхний өдөр АНУ-ын засаг захиргаа Украинд $1 тэрбумын дүнтэй зэр зэвсэг, хүмүүнлэгийн шинэ багц тусламж үзүүлэх болсныг зарласан юм.
Эх сурвалж: Reuters