Норвегийн нэг иргэн эрүүлжихийн тулд алхдаг болсны үр дүнд хөрсөн дороос ховор үнэт эрдэнэс илрүүлсэн тухай эх сурвалжууд мэдээлжээ.

Хөдөлгөөний дутагдлаа арилгахын тулд байнга алхаж байхыг эмч зөвлөсний дараа 51 настай Эрленд Боре өөртөө шинэ хобби бий болгосон юм байна.

Тэрбээр өдөр бүр алхаж, алхалтаа зорилготой болгохын тулд металл илрүүлэгч худалдан авч, газрын хөрсөн дороос элдэв зүйлс хайдаг болжээ.

Боре ихэнхдээ хаягдал төмөр, хүмүүсийн гээсэн орчин үеийн зоос зэргийг олдог байсан гэнэ.

Харин нэг өдөр тэр 30 орчим сантиметрийн гүнээс гурван алтан бөгж, хүзүүний зүүлтийн алтадсан хэсгүүдийг олжээ.

“Эхлээд би зоосон хэлбэртэй шоколад, хуванцар тоглоом оллоо гэж бодсон. Гэтэл энэ нь жинхэнэ эрдэнэс байжээ” гэж Боре орон нутгийн хэвлэлд ярьсан байна.

Олдвор нь нийтийн тооллын тавдугаар зууны үеийн эд зүйлс байсныг судлаачид тогтоожээ. Нарийн ур хийцтэй ийм гоёлыг тухайн үеийн өндөр хэргэм зэрэгтэй хүмүүс хэрэглэдэг байсан нь гарцаагүй гэж тэд дүгнэсэн байна.

“Норвегийн нутгаас үүнтэй ижил төстэй эд зүйлс 19 дүгээр зуунаас хойш олдоогүй байсан. Энэ нь нийт Скандинавын хойгоос илэрсэн ер бусын ховор олдвор юм” гэж Ставангерын их сургуулийн профессор Хакон Рейерсон ярьж байна. Тиймээс үүнийг "зууны олдвор" гэж тодорхойлж байгаа гэнэ.

Нийтийн тооллын 400-550 оны үед Европ даяар хүн амын шилжилт хөдөлгөөн эрчимтэй явагдаж, соёлын солилцоо өргөн хүрээтэй байсны илрэл гэж олдворыг судлаачид тайлбарлажээ.

Норвегийн хуулиар 1537 оноос өмнөх бүх эд зүйлс, 1650 оноос өмнөх үеийн зооснууд улсын өмчид тооцогддог байна.

Тиймээс Боре олсон бүх зүйлсээ орон нутгийн түүхийн музейд хүлээлгэн өгчээ.

Эх сурвалж: Associated Press