Оросын зэвсэгт хүчин хөрш Беларусийн нутаг дэвсгэрт байрлаж байсан бүх хүн хүч, зэвсэг техникээ татсан тухай эх сурвалжууд өнгөрсөн долоо хоногт мэдээлжээ.
2022 оны аравдугаар сард Беларусийн ерөнхийлөгч Александр Лукашенко хоёр улсын хамтарсан зэвсэгт хүчний анги нэгтгэлийг нутаг дэвсгэртээ байгуулж, Украины талаас үйлдэж болзошгүй эзлэн түрэмгийллээс урьдчилан сэргийлэх болсноо зарлаж байв.
Тэгвэл Пүрэв гарагт Украины хил хамгаалах газар Беларусийн нутгаас Оросын зэвсэгт хүчин бараг бүрэн гарсныг мэдээлжээ.
Беларусийн нутагт “шинэ анги нэгж нэмж ирээгүй”, үлдсэн цэргийн тоо нь Украины хойд хилд аюул занал учруулахааргүй хэмжээтэй болохыг тус байгууллагын хэвлэлийн төлөөлөгч Андрей Демченко сэтгүүлчдэд мэдээлсэн юм. Беларусь улсад Оросын армийн 10,000-11,000 орчим алба хаагч бий гэж Украины тал тооцоолж байжээ.
Беларусийн сөрөг хүчний Хажун төслийнхөн уг мэдээллийг бас баталсан юм.
Тухайлбал долдугаар сарын эхээр Оросын цэрэг Беларусийн нутгаас бүрэн гарсан бол наймдугаар сарын эхээр агаарын зэвсэгт хүчний нэгж нь гарсан байна.
Нийтдээ 11 байлдааны болон ачааны нисдэг тэрэг, есөн ширхэг сөнөөгч онгоц Беларусийн агаарын баазаас нутгийн зүг хөөрснийг уг эх сурвалж дурджээ.
Үүнээс гадна Вагнер хувийн зэвсэгт хүчний 2,500 орчим хөлсний цэрэг Москва, Минскийн эрх баригчдын тохиролцсоны дагуу Беларусьт байрласан хэвээр байгааг Оросын эрэн сурвалжлах сэтгүүлзүйн “Важные истории” суваг мэдээлсэн байна.
Эх сурвалж: The Moscow Times