Өнгөрсөн сард болсон эмэгтэйчүүдийн хөл бөмбөгийн дэлхийн аварга шалгаруулах тэмцээнд Испани улсын шигшээ баг түрүүлж, түүхэн амжилт гаргасан юм.

Австралийн Сидней хотод болсон шагнал гардуулах ёслолын үеэр Испанийн хөл бөмбөгийн холбооны ерөнхийлөгч Луиз Рубиалес өөрийн шигшээ багийн гол тоглогчдын нэг Жэнни Эрмосогийн уруул дээр чанга үнссэн нь дуулиан дэгдээж байв.

Наймдугаар сарын 20-нд болсон энэ үйл явдлын дараа бусдыг зөвшөөрөлгүй үнссэн, бэлгийн дарамт үзүүлсэн Рубиалесыг огцруулах олон нийтийн шаардлага эрчимжсэн юм. Испанийн ерөнхий сайд хүртэл Рубиалесыг огцрох ёстой гэж үзэж байв.

Дэлхийн хөл бөмбөгийн дээд удирдах байгууллага FIFA өөрийн зохион байгуулсан арга хэмжээнүүдэд оролцох Рубиалесын эрхийг гурван сарын хугацаагаар хасаж, гаргасан зохисгүй үйлдлийнх нь мөрөөр шалгах ажлыг эхлүүлсэн байна. Испанийн хэсэг прокурор өнгөрсөн долоо хоногт түүний эсрэг шүүхэд гомдол гаргажээ.

Өнгөрсөн хугацаанд Рубиалес олон нийтээс болон тамирчдаасаа уучлал гуйсан ч огцрохоос зайлсхийсээр байсан юм. Тэрбээр харилцан зөвшилцсөний үндсэн дээр үнссэн гэх зэргээр өөрийгөө өмөөрөх элдэв тайлбар өгсөөр байв.

Гэвч удаан тэмцэлдсэний эцэст Ням гарагт тэр албан тушаалаасаа огцрох шийдвэрээ зарлажээ.

Тэрбээр Испанийн хөл бөмбөгийн холбооны ерөнхийлөгчийн албан тушаалаас татгалзаад зогсохгүй Европын UEFA холбооны дэд ерөнхийлөгчийн суудлаасаа огцрохоор болсон байна.

“FIFA-гаас авсан арга хэмжээ болон шүүхэд миний эсрэг гомдол гаргасны дараа би албан тушаалдаа үлдэх боломжгүй боллоо. Албан тушаалтайгаа зууралдах нь холбоонд ч, Испанийн хөл бөмбөгт ч ашиггүй нь тодорхой байна” гэж Рубиалес мэдэгдэлдээ өгүүлжээ.

Хөл бөмбөгийн спортын тамирчин асан 46 настай тэрбээр 2018 оноос хойш Испанийн хөл бөмбөгийн холбоог удирдаж байгаа юм.

Рубиалесыг огцрох болсноо зарласны дараа Испанийн хөдөлмөрийн сайд Йоланда Диаз “Феминизм манай улсад улам хурдтай хөгжиж байна. Бидний амьдрал өөрчлөгдөж, сайжрах нь гарцаагүй. Бид Жэннитэй, бүх эмэгтэйчүүдтэй хамт байна” гэж Х хуудсандаа бичжээ.

Эх сурвалж: AFP