Ням гарагт Ливи улсын эрэг орчмын нутгийг Даниэл далайн хар салхи дайрахад хуучирч муудсан хоёр далан нурснаас асар хүчтэй үер буусан юм.
Далангийн ус Газар дундын тэнгист цутгахдаа зам дагуу тааралдсан хот сууринуудыг живүүлсэн байна. Хамгийн их хохирол амссан Дерна хотод 2,300 хүн амиа алдсан нь тогтоогдсон бол гамшигт нэрвэгдсэн нутагт нийтдээ 10,000 орчим хүн сураггүй болсныг Улаан Хавирган Сар нийгэмлэг мэдээлжээ.
Хөрш Египет улсаас хүмүүнлэгийн тусламж Ливид ирсэн бол АНУ, Герман, Иран, Итали, Катар, Турк зэрэг улсууд тусламж илгээснээ болон илгээх шийдвэрээ зарлаад байна.
Гэвч хоорондоо дайтагч хоёр засгийн газарт хуваагдсан тус улсад аврах ажиллагааг зохион байгуулахад хүндрэл тулгарч байна.
Усны мэргэжилтнүүдийн тайлбарласнаар эхлээд Дерна хотоос 12 км зайтай оршдог далан задарч, их хэмжээний ус голын сав дагуу үерлэсэн байна.
Энэ үер удалгүй Дерна хотын ойролцоо оршдог хоёр дахь даланг нурааснаар урсгалын хүч улам нэмэгджээ.
Ливи улсад 2011 онд дарангуйлагч Муаммар Каддафийн дэглэм унасны дараа улс төрийн эмх замбараагүй байдал үүссэн юм.
Одоо тус улсыг нийслэл Триполид төвтэй олон улсад хүлээн зөвшөөрөгдсөн засгийн газар болон нутаг дэвсгэрийн зүүн хэсэгт хяналтаа тогтоосон цэргийн засгийн газар хуваан засаглаж байна.
Энэ удаагийн үерийн гамшиг цэргийнхний хяналтад байгаа Ливийн зүүн хэсэгт тохиосон юм.
Хэдийгээр зөрчилтэй байгаа ч Триполийн засгийн газар гамшгийн бүсэд 14 тонн эм, эмнэлгийн хэрэгсэл ачсан нисэх онгоцыг 80 гаруй эмчийн хамт илгээжээ.
Каддафийн дэглэм унасны дараа Дерна хотыг Исламын Улс террорист бүлэг хяналтдаа авч байв. Дараа нь Ливийн зүүн хэсэгт хяналтаа тогтоосон засгийн газрын холбоотон генерал Халифа Хафтарын арми тус хотыг эзлэн авч байжээ.
Олон жилийн мөргөлдөөн, үймээн самуун Дерна хотын дэд бүтцийн засвар арчилгааг тасалдуулж, доройтуулсан нь байгалийн гамшигт илүү өртөмхий болгосон гэж ажиглагчид үзэж байна.
Эх сурвалж: BBC
