Крымийн хойгийн Севастополь боомтод засвар үйлчилгээнд орж байсан Хар тэнгисийн флотын хоёр хөлөг Украины пуужингийн цохилтод өртсөн тухай Оросын батлан хамгаалах яам өчигдөр мэдээлжээ.
Цохилтын үеэр хөлөг онгоцны үйлдвэрт гал гарч, 24 хүн шархадсан болохыг Москвагаас томилогдсон Севастополь хотын захирагч бас мэдээлсэн байна.
2014 онд ОХУ-ын бүрэлдэхүүнд хүчээр нэгтгэгдсэн Крымийн хойгт сүүлийн өдрүүдэд Украины армийн халдлага довтолгоо эрчимжээд байгаа.
“Украины зэвсэгт хүчин С.Оржоникидзегийн нэрэмжит усан онгоцны засварын үйлдвэрт 10 ширхэг далавчит пуужингаар довтоллоо. Энэ үеэр засварт орж байсан хоёр хөлөг онгоц дайсны цохилтод өртөж, гэмтсэн байна” гэж ОХУ-ын батлан хамгаалах яам Телеграм хуудсандаа мэдээлжээ.
Үүнээс гадна Украины тал гурван ширхэг тэнгисийн дроноор Хар тэнгисийн флот руу халдахыг оролдсон тухай мэдээлсэн юм.
“Агаараас хамгаалах систем дайсны долоон далавчит пуужинг устгасан бол 'Василий Быков' харуулын хөлөг жолоочгүй завинуудыг аюулгүй болголоо” гэж дээрх мэдэгдэлд өгүүлсэн байна.
“Урьдчилсан байдлаар цохилтын улмаас 24 хүн шархадсаныг тогтоолоо. Тэдгээрийн дөрвөөс бусад нь хөнгөн шархтай байна” гэж Севастополь хотын захирагч Михаил Развожаев газар дээрээс нь мэдээлжээ.
Украин болон Оросын зарим албан бус эх сурвалжууд энэ халдлагын үеэр газар уснаа явагч нэг хөлөг, нэг шумбагч хөлөг сүйдсэн тухай мэдээлж байна.
Халдлагын талаар Киевийн эрх баригчид албан ёсны мэдээлэл өгөөгүй байна.
Үүнээс гадна Мягмар гарагаас Лхагва гарагт шилжих шөнө Оросын тал Иранд үйлдвэрлэсэн 44 ширхэг Шахед дроноор Одесса мужийн өмнөд хэсэгт довтлоход 32-ыг нь устгасан тухай Украины зэвсэгт хүчин мэдээлжээ.
Эх сурвалж: AFP