Хятадын даатгалын хамгийн том байгууллага болох China Life Insurance төрийн өмчит корпорацын ерөнхийлөгч асан Ван Бинь авлигын хэргээр шийтгүүлжээ.

Шаньдун мужийн шүүхээс түүнд хоёр жилийн хугацаатай цаазын ял оноосон байна. Хоёр жилийн дараа ялыг нь бүх насаар хоригдох ял болгон өөрчлөхөөр болжээ. Гэхдээ хэзээ ч өршөөгдөхгүй байх нөхцөлийг шүүхийн шийдвэрт тусгасан байна.

Ван өндөр албан тушаал хаших хугацаандаа 325 сая юанийн ($44.6 сая) авлига авсныг прокурорын байгууллага шалгаж тогтоожээ.

Үүнээс гадна тэр 54.2 сая юанийг гадаадын банкны дансанд байршуулсан нь илэрсэн байна.

Сүүлийн хоёр жил гаруй хугацаанд Хятадын коммунист нам $60 их наядын хөрөнгө эргэлддэг санхүүгийн салбараа авлигаас цэвэрлэх томоохон ажиллагаа явуулж байгаа.

Энэ салбараас хатуу шийтгэл хүлээсэн ээлжит өндөр албан тушаалтан Ван Бинь болж байна.

Үүнээс өмнө 2021 онд Хятадын томоохон хөрөнгийн менежмэнтийн компани Huarong-ийн ерөнхийлөгч асан Лай Шаоминь авлигын хэргээр цаазын ял сонссон юм.

Мөн тэр жил China Development Bank банкны ерөнхийлөгч асан Ху Хуайбан 85.5 сая юанийн авлигын хэргээр бүх насаар хоригдох ял сонсжээ.

China Renaissance Holdings корпорацын гүйцэтгэх захирал, Хятадын хамгийн нөлөө бүхий банкируудын нэг Бао Фан энэ оны хоёрдугаар сараас хойш сураггүй болоод байгаа.

Түүнийг томоохон авлигын хэрэгт шалгагдаж байгаа гэсэн мэдээлэл бий.

Эх сурвалж: BBC