Хэдэн жилийн өмнө Япон улсын засгийн газар дутагдаж буй ажиллах хүчний орон зайг нөхөх зорилгоор тус улсад байнга оршин суугчийн визийн шинэ ангиллыг бий болгож байв.

Тусгай мэргэжлийн ажилчин гадаадаас авах энэ хөтөлбөр ахмадын асаргаа сувилал, хөдөө аж ахуй, барилга, үйлдвэрлэлийн салбаруудад чиглэж байсан юм.

Тэгвэл одоо такси, автобус, ачаа тээврийн жолоочийн зах зээлд гадаадын иргэдийг авах асуудал тус улсын холбогдох яамдын хүрээнд яригдаж эхэлжээ.

Тухайлбал таксины жолоочийн ажлын байрыг залуу үеийнхэн тоохгүй болсноос дундаж нас нь 58.3 болсон байна. 2021 оны албан ёсны тоо баримтаас үзвэл Японд 220,000 орчим таксины жолооч байжээ. Хэдийгээр энэ нь хангалттай мэт сонсогдож байгаа ч 2011 онд 340,000 байсантай харьцуулахад 30 гаруй хувиар буурсан үзүүлэлт юм байна.

Цар тахлын улмаас хүмүүсийн гадуур зорчих багассан, аялал жуулчлал хумигдсан зэргээс үүдэлтэйгээр сүүлийн жилүүдэд олон таксины жолооч ажлаа солих болон тэтгэвэртээ гарчээ.

Харин одоо уг салбар дахин сэргэж эхэлснээс үүдэлтэйгээр ажиллах хүчний хомсдол нүүрлэсэн байна.

Тиймээс Японы Такси Тээврийн Холбоо, Автобусны Холбоо, Ачаа Тээвэрлэгчдийн Холбоо гадаадаас тусгай ажилчин авах хөтөлбөрт өөр өөрийн салбаруудыг хамруулахаар засгийн газартаа ханджээ.

Эх сурвалжийн мэдээлснээр Японы Газар, Тээвэр, Дэд бүтэц, Аялал жуулчлалын яам уг асуудалд нээлттэй хандахаа илэрхийлж, Цагаачлалын Албатай хамтран боломжийг судлахаар болсон байна.

Бусад салбартай харьцуулахад мэргэжлийн жолооч нарыг гадаадаас авахад илүү олон асуудал тулгарахаар байгаа гэнэ. Тухайлбал Японы стандартын жолооны эрх авах, хэлний мэдлэгийн бэрхшээлийг шийдэх зэрэг асуудлууд тулгарсан байна.

Үйлдвэрийн ажилчид нэг газраа хүмүүстэй харьцахгүй ажиллах боломжтой бол таксины жолооч нар хүмүүстэй шууд харилцаж, замын хөдөлгөөнд оролцож, хаягжилтыг сайн мэддэг байх шаардлага байгаа юм байна.

Тиймээс засгийн газрын холбогдох яам агентлагууд энэ салбарт ажиллах гадаадын иргэдэд зориулсан сургалтын материал, шалгалтын стандарт зэргийг боловсруулахад анхаарч байгаа гэнэ.

Эх сурвалж: Mainichi Shimbun