Мексик улсад үйл ажиллагаа явуулдаг зохион байгуулалттай гэмт хэргийн бүлгүүдийн нийт гишүүдийн тоо 175,000 хүрч, тус улсын тав дахь том ажил олгогч болсныг шинэ судалгааны үр дүн харуулжээ.
Хэсэг судлаачдын сүүлийн арван жилийн аллага, хүний хулгай зэрэг ноцтой гэмт хэргүүд, өрсөлдөгч бүлгүүдийн харилцаа холбоо, үйл ажиллагааны хүрээ зэрэг мэдээллийг нэгтгэн боловсруулсан математик загварчлалаар дээрх тоог гаргасныг өчигдөр буюу Пүрэв гарагт Sicence сэтгүүлд нийтэлсэн байна.
2007-оос 2021 оны хооронд Мексик улсад аллагын тоо гурав дахин өсөж, 100,000 хүн тутамд оногдох хохирогчийн тоо 27 хүрсэн нь дэлхийд дээгүүр орох үзүүлэлт болжээ.
Мексик улсын хэмжээнд Синалоа болон Халиско Шинэ Үеийнхэн гэсэн хоёр том картель хоорондоо өрсөлддөг. Гэхдээ тэдэнтэй гэрээгээр ажилладаг болон орон нутгийн хэмжээнд үйл ажиллагаа явуулдаг нийт 198 зэвсэгт бүлэглэл байгааг энэ судалгаагаар тогтоожээ.
Мексикт гэмт хэргийн гаралтыг бууруулах хамгийн үр дүнтэй арга нь дээрх бүлгүүдийн гишүүдийн тоог цаашид өсгөхгүй хязгаарлах гэсэн дүгнэлтийг судлаачид хийсэн байна.
Харин гэмт хэрэгтнүүдийг олноор нь баривчилж, шоронд хорьсноор асуудал шийдэгдэхгүй гэж дүгнэжээ.
“Латин Америк даяар 1.7 сая гаруй хүн шоронд хоригдож байгаа бөгөөд тэдний тоог нэмэгдүүлснээр асуудал шийдэгдэхгүй” гэж судалгааны тайланд бичсэн байна.
“Хэрвээ картелиуд гишүүн элсүүлж чадахгүй бол хохирлоо нөхөх боломжгүй болж, хүчирхийлэл мөргөлдөөн аажмаар буурах төлөв харагдаж байна. Гэхдээ ийм механизмыг амьдрал дээр яаж хэрэгжүүлэх боломжтойг батлан харуулсан жишээ одоогоор алга байна” гэж тайланд бас өгүүлжээ.
Мексикийн одоогийн ерөнхийлөгч Андрес Мануэл Лопез Обрадор зохион байгуулалттай гэмт хэрэгтэй хүч хэрэглэлгүй, зөөлөн аргаар тэмцэх “сумны оронд тэврэлт” гэсэн нэртэй бодлого хэрэгжүүлж байгаа нь дээрх судалгааны дүгнэлттэй таарч байгаа юм.
Тухайлбал залуу үеийнхэнд эдийн засгийн хувьд илүү сонирхол татахуйц боломжуудыг олгож, гэмт хэрэгт автахаас сэргийлэх арга механизм нэвтрүүлэхийг зорьж байгаа.
Гэхдээ энэ стратеги бүтэлгүйтэж, Обрадорын засаглалын жилүүдэд гэмт хэргийн гаралт улам өссөн юм.
Энэ нь түүний засгийн газрын хэрэгжүүлж буй бодлого байгаа онохгүй байгаагийн илрэл болж байна.
Эх сурвалж: The Guardian
