Цэцэрлэгийн шалан доороос гарсан мансууруулах бодис
Пүрэв гарагт Нью-Йорк хотын Бронкс дүүргийн нутаг дэвсгэрт оршдог хүүхдийн цэцэрлэгийн байрнаас цагдаа нар их хэмжээний мансууруулах бодис илрүүлжээ.
Хотын цагдаагийн газраас тараасан гэрэл зурагт цэцэрлэгийн шалан доороос олдсон ууттай нунтаг бодисуудыг харуулсан байна. Тэдгээрийн ихэнх нь фентанил төрлийн мансууруулах бодис байжээ.
Өнгөрсөн долоо хоногийн Баасан гарагт тус цэцэрлэгийн дөрвөн хүүхдийн бие муудаж, эмнэлэгт хүргэгдсэнээс нэг настай хүү амиа алдсан юм.
Хүүхдүүд мансууруулах бодист хордсон байжээ.
Уг хэрэгтэй холбогдуулан цэцэрлэгийн эзэн 36 настай Грэй Мендез, цэцэрлэгийн байрны өмчлөгч 41 настай Карлисто Асеведо Брито нарыг сэжигтнээр баривчилсан байна.
Хэрвээ тэдний буруутай нь тогтоогдвол бүх насаа хоригдох ял сонсох юм.
Цэцэрлэгийн эзэн Грэй Мендез
Цэцэрлэгийн шалан дор нуусан мансууруулах бодис 500,000 хүний амийг хөнөөхөд хүрэлцэхүйц хэмжээтэй байсныг мөрдөгч нар мэдээлжээ.
Мендез цэцэрлэгт нь мансууруулах бодис нуусныг мэдээгүй бөгөөд үүнийг нөхрийнх нь үеэл Бритогийн үйлдсэн хэрэг гэж мэдүүлсэн байна.
Тэрбээр анх цэцэрлэгийн хүүхдүүд унтаад сэрэхгүй байгааг мэдсэний дараа цагдаад дуудлага өгч байжээ.
Гэхдээ тэр дуудлага өгөхөөсөө өмнө нөхөртэйгөө хэд хэдэн удаа холбогдсоныг камерын болон утасны бичлэгүүд гэрчилсэн байна.
Дараа нь түүний нөхөр цэцэрлэгт ирж, хэд хэдэн тортой зүйл авч гарсныг мөрдөгчид баримтаар тогтоожээ.
Баривчлагдахаасаа өмнө Мендез нөхөртэйгөө харилцаж байсан 20,000 орчим мессэжийг гар утаснаасаа устгаж амжсан ч прокурорууд дараа нь сэргээж чадсан байна.
Одоо цагдаа нар Мендезийн нөхрийг эрэн сурвалжилж байгаа ажээ.
Фентанил нь синтетик өвчин намдаагч бөгөөд героиноос 50 дахин хүчтэй бодис юм. Сүүлийн жилүүдэд АНУ даяар мансууруулах бодистой холбоотой үхлийн тоо нэмэгдсэн нь фентанилаас болсон гэж мэргэжилтнүүд үздэг.
2010 онд АНУ-д 40,000 хүрэхгүй тооны хүн мансууруулах бодисын тун хэтрүүлсэн шалтгаанаар амиа алдахад 10 хүрэхгүй хувь нь фентанил хэрэглэсэн байжээ. Тэгвэл 2021 онд тун хэтрүүлж амиа алдсан хүний тоо 100,000 давсны 66 хувь нь фентанилаас болсон байна.
Эх сурвалж: BBC
