Сүүлийн 10 сар орчим хугацаанд Азербайжаны армийн хориглолтод гадаад ертөнцөөс тусгаарлагдаад байсан Уулын Карабахын дүрвэгчдийн эхний хэсэг Армени улсын нутаг дэвсгэрт ирсэн тухай Ням гарагт Ереваны эрх баригчид мэдээллээ.

Уулын Карабахын хот тосгодоос дүрвэж ирсэн нийт 1,050 хүн өчигдөр Арменийн хилээр нэвтэрсэн байна.

2020 оноос хойш энэ бүс нутагт байрлаж буй Оросын энхийг сахиулагчид дүрвэгсдийн цувааг хил хүртэл хамгаалсныг ОХУ-ын батлан хамгаалах яам мэдээлжээ.

Азербайжаны нутаг дэвсгэрийн нэг хэсэг гэж албан ёсоор үздэг ч армени үндэстнүүд голлон суудаг Уулын Карабахын бүс нутаг Зөвлөлт Холбоот Улс задарсны дараа 1994 онд Бакугийн захиргаанаас татгалзаж, салан тусгаарлагчдын хяналтад шилжсэн юм.

Салан тусгаарлагчдыг хөрш Армени улсын эрх баригчид тал бүрээр дэмждэг байв.

2020 онд зургаан долоо хоног үргэлжилсэн дайны дараа Азербайжаны арми өмнөх дайнд Арменийн армийн эзэлж авсан Уулын Карабахыг тойрсон газар нутгийг буцаан авч, хяналтаа тогтоосон юм.

Үүний улмаас энэ бүс нутаг хөрш Армениас алслагдаж, Лачины коридор хэмээх ганцхан замаар холбогдож үлджээ.

Өнгөрсөн оны арванхоёрдугаар сард Азербайжаны арми уг замыг хааснаар Уулын Карабахын салан тусгаарлагчдын засаг захиргаа Армени улсаас ямар ч дэмжлэг авах боломжгүй болсон юм.

Өнгөрсөн долоо хоногийн Мягмар гарагт Азербайжаны арми салан тусгаарлагчдын байрлалуудад их буугаар цохилт өгч, зэвсгээ хаян бууж өгөхийг шаардаж эхэлжээ.

Үүний дараа Уулын Карабахын салан тусгаарлагчид бууж өгснөөр тус бүс нутгийг 120,000 орчим оршин суугчийнх нь хамт буцаан нэгтгэх ажиллагаа эхэлснийг Азербайжаны тал зарлаад байгаа.

Армени улсын ерөнхий сайд Никол Пашинян өчигдөр ард түмэндээ хандаж хэлсэн үгэндээ “олон улсын хамтын нийгэмлэг, олон улсын механизмуудын тусламжтайгаар Уулын Карабахын армениудын аюулгүй байдлыг хангахын төлөө ажиллаж, хэрвээ энэ хүчин чармайлт нь үр дүнд хүрэхгүй бол үндэс угсаа нэгтнүүдээ хүлээж авахад бэлэн” гэж мэдэгджээ.

Азербайжаны цэргийн ажиллагаанд зохих хариу арга хэмжээ авч чадаагүй Арменийн засгийн газар, Оросын энхийг сахиулагчдад бухимдсан иргэд сүүлийн өдрүүдэд Ереван хотод тасралтгүй жагсаж байна.

Ням гарагт Арменийн нийслэлийн төвд олон зуун хүн цугларч, ерөнхий сайд Пашиняныг огцрохыг шаарджээ.

Өнгөрсөн долоо хоногт байгуулагдсан гал зогсоох гэрээний дагуу Уулын Карабахын салан тусгаарлагчдын зэвсгийг хураах ажил үргэлжилж буйг Азербайжаны засгийн газар Ням гарагт мэдээлсэн байна.

Эх сурвалж: Associated Press