Ерөнхийлөгч Жо Байдены засаг захиргаа удахгүй Израилын иргэдийг визгүй нэвтрүүлдэг болох гэж буйг АНУ-ын албаны эх сурвалжууд мэдээлжээ.
Энэ долоо хоногийн Бямба гарагт холбооны төсвийн жил дуусахаас өмнө амжиж уг шийдвэрийг зарлах төлөвтэй байгааг эх сурвалж мэдээлсэн байна. Хэрвээ шийдвэр гарвал Израилын иргэд ирэх оноос эхлэн АНУ-д визгүй зорчдог болох гэнэ.
Өнгөрсөн долоо хоногт Нью-Йорк хотод болсон НҮБ-ын ерөнхий ассамблейн чуулганы үеэр АНУ-ын ерөнхийлөгч Жо Байден, Израилын ерөнхий сайд Бенжамин Нетаньяху нар уулзаж байв. Гэхдээ тэд хамтарсан мэдэгдэлдээ визийн асуудлыг хөндөөгүй юм.
Одоогоор Европ, Азийн нийт 40 улсын иргэд АНУ-д визгүйгээр гурван сарын хугацаанд зорчих эрхтэй байдаг.
АНУ-ын визийн асуудал нь Израилын үе үеийн удирдагчдын нэн тэргүүний зорилт байсаар ирсэн.
Тиймээс хэрэгжвэл одоогийн ерөнхий сайд Бенжамин Нетаньяхугийн засгийн газрын хувьд том амжилт болох юм.
АНУ-д иргэд нь визгүй зорчдог болохын тулд дэлхийн улс орнууд гурван үндсэн шалгуурыг хангах ёстой гэж үздэг.
Израил улс визийн татгалзсан хувь, визийн хугацаа хэтрүүлсэн хувь бага байх гэсэн хоёр үндсэн шалгуурыг хангадаг юм байна.
Харин АНУ-ын бүх иргэн ямар нэг ялгаваргүйгээр Израилд зорчдог байх гэсэн гурав дахь шаардлагыг хангадаггүй байжээ. Тухайлбал палестин гаралтай АНУ-ын иргэдэд Израилын эрх баригчид ялгавартай ханддаг нь гол асуудал болж байв.
Үндэсний аюулгүй байдлын шалтгаанаар Израил улс палестин гаралтай АНУ-ын иргэдийг хүлээж авахдаа тусгай хяналт тавьдаг байжээ.
Ийм иргэдийг тус улс Йордан голын баруун эрэг, Газын зурвас зэрэг палестинчууд амьдардаг бүс нутгуудад нэвтрүүлдэггүй байв.
Тиймээс тэд эдгээр бүс нутагт зорчихдоо хөрш Йордан, Египет улсуудаар дамждаг байжээ.
Харин сүүлийн саруудад Израилын эрх баригчид энэ шалгуураа хөнгөвчилж, палестин гаралтай АНУ-ын иргэдэд хандах хандлагаа өөрчилсөн тухай эх сурвалжууд мэдээлж байгаа.
Эх сурвалж: Associated Press