Уулын Карабахын салан тусгаарлагчдын засгийн газарт сайдын албан тушаал хашиж байсан бизнесмэн Рубен Варданяныг өчигдөр Арменийн хилийг давах гэж байхад нь Азербайжаны цэргүүд баривчилжээ.
Тэрбээр ОХУ-д хөрөнгө оруулалтын банк ажиллуулж хөрөнгөжсөн хүн бөгөөд 2022 онд Уулын Карабахт шилжин суурьшиж, засаг захиргаанд нь өндөр албан тушаал хашиж эхэлсэн юм.
Варданян 2023 оны хоёрдугаар сард албан тушаалаасаа огцорсон ч Уулын Карабахт нөлөөтэй нэгэн хэвээр байжээ.
Өнгөрсөн долоо хоногт тэр өөрийг нь Азербайжаны эрх баригчид хамгийн түрүүнд баривчлахыг мэдэж байгаагаа хэвлэлд ярьж байв.
“Энэ бол амьдрал юм. Хэрвээ эх орныхоо төлөө үхэхэд бэлэн байгаа бол, ямар нэг чухал үйл хэргийн төлөө тэмцэж байгаа бол үүнд бэлтгэлтэй байх ёстой. Түүхийн төгсгөл маш муу байж болно. Би эхний өдрөөс л үүнд бэлэн байсан. Би ийм зүйл болохыг мэдэж байсан” гэж Варданян ярьж байжээ.
Өчигдрийн байдлаар Уулын Карабахын бүс нутгаас оршин суугчдынх нь 40 орчим хувь буюу 50,000 хүн хөрш Армени улс руу дүрвээд байна.
Өнгөрсөн долоо хоногийн Мягмар гарагт Азербайжаны зэвсэгт хүчин байлдааны ажиллагаа явуулсны үр дүнд 30 орчим жил армени үндэстний салан тусгаарлагчдын хяналтад байсан Уулын Карабахыг бүрэн эзлэн авсан юм.
Варданян ярилцлагадаа Азербайжаны ерөнхийлөгч Илхам Алиевыг армени үндэстний эсрэг цэвэрлэгээ явуулж байгаад буруутгаж, тус улсын эсрэг хориг арга хэмжээ авахыг олон улсад уриалж байв.
Азербайжаны засгийн газар өөрийнх нь албан ёсны газар нутаг болох Уулын Карабахт хууль бусаар нэвтэрсэн Варданяныг баривчилж, Баку руу хүргэсэн талаар мэдээлжээ.
Варданяны эхнэр Вероника Зонабенд өмнөх өдрийн орой нь нөхрөөсөө хамгийн сүүлийн мессэж хүлээж авснаа ярьсан байна.
“Тэр үндэс угсаа нэгтнүүддээ туслах зорилгоор Карабахт очиж байсан. Ийм удаан хугацаагаар тэнд байснаас түүний хэн болох, ямар улс төрч болох нь харагдаж байна. Олон улсын хамтын нийгэмлэг түүнд маань тусална гэдэгт найдаж байна” гэж тэр ярьжээ.
Эх сурвалж: The Guardian