Үндэсний их баяр наадмыг зохион байгуулах хорооны хурал өчигдөр болсон.

Монгол Улсын арслан М.Бадарчийн шинжилгээнээс Дэлхийн допингийн эсрэг агентлагаас гаргасан хориглосон жагсаалтад орсон бодис илэрсэн тул уг барилдааны бүх давааг хүчингүйд тооцож, улсын арслан цолыг хураах саналыг Монгол Улсын Ерөнхийлөгчид уламжлахаар тус хурлаас шийдвэрлэсэн.

М.Бадарчийн Үндэсний их баяр наадмаар барилдах эрхийг 2027 оны долдугаар сарын 12-ныг дуустал дөрвөн жилийн хугацаагаар хассан ба аймгийн хурц арслан Бүрнээгийн Баянмөнхийг тав давсанд тооцож улсын начин, өсөх идэр начин Эрдэнэбатын Дашийг зургаа давсанд тооцож улсын харцага, улсын харцага Сүхбаатарын Сүхбатыг долоо давсанд тооцож улсын заан, улсын гарьд Цэрэнсодномын Бямба-Отгоныг ес давсанд тооцож улсын арслан цол олгох саналыг Монгол Улсын Ерөнхийлөгчид уламжлахаар тогтлоо. Мөн улсын аварга Оргихын Хангайд “үлэмж бадрах” чимэг олгохоор болсон юм.

Үүнтэй холбоотойгоор бөх сонирхогчдын дунд гарсан яриа бол допинг хэрэглэсэн М.Бадарч Улсын Аварга О.Хангайг баллачихлаа гэдэг харуусал байв.

Ховд аймгийн харьяат Улсын аварга О.Хангай, Архангай аймгийн Цэнхэр сумын харьяат Нутгийн буян компанийн бөх Улсын гарьд М.Бадарч нар наймын даваад тунаж барилдсан.

Хэрэв допингтэй бөхөд өвдөг шороодоогүй байсан бол О.Хангай аваргад түрүүлэх ч магадлал өндөр байсан нь нууц биш. Энэ жил Улсын Аварга О.Хангай онцгой сайн бэлтгэлтэй, бяр тэнхээтэй байсан. Тиймдээ ч улсын баяр наадмын дараа болсон хоёр ч аймгийн 100 жилийн ойн наадмын барилдаанд итгэл төгс түрүүлсэн юм.

Допинг хэрэглэсэн бөх зөвхөн төрийн баяр наадам, ард түмний их цэнгэлийг гутаагаад зогсохгүй амжилттай сайн барилдах бөхийн замналд ч гай болдог ажээ.

С.Сарнай

Sonin.mn