Уулын Карабахын салан тусгаарлагчдын засгийн газар ирэх оны эхнээс татан буугдах болсноо өчигдөр зарлажээ.
Албан ёсоор Азербайжаны нутаг дэвсгэрт тооцогддог ч сүүлийн 30 орчим жилийн турш армени үндэстний салан тусгаарлагчдын хяналтад байсан тус бүс нутгийн хувь заяа ийнхүү шийдэгдэж байна.
Уулын Карабахын Бүгд Найрамдах Улсын ерөнхийлөгч Самвел Шахраманян төр засгийн бүх байгууллагуудаа 2024 оны нэгдүгээр сарын 1-нээс эхлэн татан буулгах зарлигт гарын үсэг зуржээ.
Өнгөрсөн долоо хоногт Азербайжаны арми 24 цаг үргэлжилсэн байлдааны ажиллагаа явуулсны дараа Уулын Карабахыг бүхэлд нь хяналтдаа авсан юм. Тэр өдрөөс хойш тус бүс нутгийн оршин суугчдын талаас илүү хувь нь хөрш Армени улсын нутагт дүрвэж очоод байна.
Уулын Карабахын ерөнхийлөгч зарлигтаа Азербайжанд нэгдэх, эсвэл Армени улс руу дүрвэх аль нэг замыг дор бүрнээ бие даан сонгохыг нутгийн иргэдэд зөвлөжээ.
Өчигдрийн байдлаар Уулын Карабахаас 70,000 гаруй армени үндэстэн дүрвэж ирснийг Арменийн ерөнхий сайд Никол Пашиняны хэвлэлийн албанаас мэдээлсэн юм.
Тус бүс нутагт 120,000 гаруй армени үндэстэн оршин суудаг гэсэн тоо бий.
Уулын Карабахыг Азербайжанд нэгтгэсний дараа “угсаатны цэвэрлэгээ” явагдаж болзошгүй гэж айсан нутгийн иргэд хөрш Армени улс руу дүрвэж байгаа.
Азербайжаны эрх баригчид уржигдар Уулын Карабахын засгийн газарт сайдын албан тушаал хашиж байсан нөлөө бүхий хүнийг Арменийн хил давах гэж байхад нь баривчилсан юм.
Бакуд хүргэгдсэн Рубен Варданянд одоо терроризмыг санхүүжүүлсэн зэрэг хэд хэдэн хэрэг тулгаж байгаа тухай мэдээлж байна.
Арменийн ерөнхий сайд Никол Пашинян угсаатны цэвэрлэгээ явуулж буй Бакугийн эрх баригчдыг буруутгаж, Уулын Карабахын армени хүн ам бүхэлдээ дүрвэж ирэх төлөвтэй байгааг мэдэгдсэн юм.
Харин Бакугийн эрх баригчид Уулын Карабахын оршин суугчдад уугуул нутагтаа үлдэж, олон үндэстний Азербайжан улсын нэг хэсэг болохыг уриалсан байна.
Эх сурвалж: The Guardian