Нийслэлийн дулаан, цахилгааны эрчим хүчний боломж нөхцөл ямар байгаа талаар Эрчим хүчний сайд Б.Чойжилсүрэнгээс тодрууллаа.
Тэрбээр "Цахилгаан эрчим хүчний хэрэглээ бодит суурилсан хүчин чадлаасаа давсан байгаа. Үүнийг ганцхан жилийн дотор шийдэж амжихгүй. Гэхдээ энэ өвөл сэтгэл арай тайван байж болно.
Эхний ээлжид Сонсголон дэд станц дээр оргил ачааллын үед нөхөх 80МВт-ын хураагуур ашиглалтад орох гэж байна. Арваннэгдүгээр сарын сүүл, арванхоёрдугаар сар гэхэд ашиглалтад авах байх.
Дорнодын цахилгаан станц 50 МВт-аар ашиглалтад орсон тохиолдолд зүүн бүсдээ 15-20 МВт өгөөд, төвийн бүс рүү хэрэглэж ирсэн цахилгааныг тэндээс нь санхүүжүүлбэл, 30 МВт-ын нөөц гарах болов уу. Ингэхээр нийт 110 МВт-ын нөөц цахилгаан эрчим хүч дээр гарна. Хэрэглээ 6-7 хувь нэмэгдэж байгаа тул бид өнгөрсөн жилийнхээ түвшинд давчих байх гэж бодож байна.
2024 оны дөрөвдүгээр улиралд Бөөрөлжүүтийн 300 МВт-ын цахилгаан станцын 150 МВт-ыг блок ашиглалтад орно. Мөн 2025 оны нэг, хоёрдугаар улиралд 150 МВт-ын блок нь ашиглалтад орчхоор 2025 оноос жаахан нөөцтэй болж эхэлнэ" гэлээ.
Мөн сайжруулсан шахмал түлшний нөөц хэвийн байгаа хэмээв.
