Кремлийн алдартай суртал нэвтрүүлэгчдийн нэг саяхан Өрнөдийнхөнд сануулга өгөх зорилгоор Сибирийн тэнгэрт цөмийн бөмбөг дэлбэлэхийг эрх баригчдадаа уриалсан нь орон нутгийн иргэдийг бухимдуулжээ.
Оросын төрийн өмчит Russia Today телевизийн сувгийн захирал Маргарита Симоньян хүмүүс, байгаль орчинд аюул учруулахгүйгээр Сибирийн хаа нэгтээ цөмийн зэвсэг хэрэглэх боломжтой тухай Даваа гарагт цацагдсан нэвтрүүлгийн үеэр ярьсан юм.
“Зөвхөн бүх электроник тоног төхөөрөмжүүд, хиймэл дагуулууд ажиллагаагүй болно. 1993 онд буцаж очсоноос ялгаагүй” гэж тэр дэлбэрэлтээс гарч болох үр дүнг тайлбарлажээ.
One of Putin’s favorite propagandists Margarita Simonyan proposes that Russia should drop a nuclear bomb over Siberia to destroy all smartphones with an EMP and “go back to the year of 1993” pic.twitter.com/V199135cg8
— Visegrád 24 (@visegrad24) October 3, 2023
Гэвч түүний санаачилга Сибирийн бүс нутгийн оршин суугчид, улс төрчдийн ширүүн шүүмжлэлтэй тулгарсан юм.
“Ингэж ярьсныхаа төлөө Сибирийн ард иргэдээс уучлалт гуйх ёстой” гэж Алтайн хязгаарыг төлөөлөн Оросын Коммунист Намаас төрийн Думд сонгогдсон Мария Прусакова өчигдөр хэвлэлд ярьжээ.
Сибирийн хамгийн том хот Новосибирскийн дарга Анатолий Локот “Цөмийн зэвсгийн дэлбэрэлт олон мянган жил үргэлжлэх ноцтой үр дагавартай” тул энэ сэдвээр болгоомжтой ярих хэрэгтэйг анхааруулсан байна.
Кремлийн хэвлэлийн албаны дарга Дмитрий Песков өнгөрсөн Мягмар гарагт сэтгүүлчидтэй уулзахдаа Симоньяны санаа Москвагийн эрх баригчдын албан ёсны байр суурь биш болохыг тайлбарлажээ.
Асуудал ингээд зогссонгүй. Москва хотын Думын гишүүн Евгений Ступиний зөвлөх Николай Королев ярьсан зүйлтэй нь холбогдуулан Симоньяныг шалгуулах хүсэлтээ ОХУ-ын дотоод хэргийн яам, мөрдөн шалгах хороонд гаргаснаа мэдээлжээ.
Сибирийн тэнгэрт цөмийн бөмбөг дэлбэлснээр Өрнөдийнхөнд хатуу анхааруулга өгөх боломжтойг тайлбарласан Симоньян “Энэ бол байж болох хамгийн хүмүүнлэг хувилбар” гэж онцолсон юм.
Эх сурвалж: The Moscow Times
