Өчигдөр үдээс хойш Украины Харьков хотоос зүүн өмнө зүгт оршдог Гроза хэмээх тосгоны 51 оршин суугч Оросын пуужингийн цохилтод амиа алджээ. Тэдний дунд найман настай хүү байсан байна.
Тухайн үед тосгоны иргэд оршуулгын ёслолд оролцож байжээ.
Тосгонд цэрэг дайны зориулалттай ямар ч байгууламж байгаагүйг Украины батлан хамгаалах яам баталсан байна.
Харьков мужийн захирагч Олег Сынехубов энэхүү эмгэнэлт явдлын улмаас Гроза тосгоны нийт оршин суугчдын 20 хувь устгагдсаныг мэдээлжээ.
“Энэ тосгоны ард иргэдийн тавны нэг нь ганцхан террорист халдлагын улмаас амиа алдлаа” гэж тэр орон нутгийн телевизээр ярьсан байна.
Оршуулгын ёслол дайнд амиа алдсан Украин цэргийнх байжээ. Түүнийг фронтод алагдсаны дараа Днепр мөрний эрэгт оршуулсныг хамаатнуудынх нь хүсэлтээр төрөлх тосгонд нь дахин оршуулж байсан юм байна.
Халдлагын үеэр уг цэргийн бэлэвсэн эхнэр, хүү, бэр зэрэг ойр төрлийн хүмүүс нь бас алагдсан тухай орон нутгийн прокурор Дмитро Чубенко мэдээлсэн байна.
Украины ерөнхийлөгч Володимир Зеленский өчигдрийн халдлагыг “араатнуудын үйлдэл гэж нэрлэх аргагүй, ингэх нь араатнуудыг доромжилсон хэрэг болно” гэж мэдэгджээ.
Тэрбээр тосгоны иргэдийн олноор цугларсан оршуулгын ёслолыг зориуд цохилтын бай болгосон Оросын талыг буруутгасан байна.
Испани улсын Гранада хотод Зеленскийг Европын удирдагчидтай уулзаж байх үеэр Оросын арми Гроза тосгонд агаарын цохилт өгчээ.
АНУ-ын дотоод улс төрийн тэмцэл Украинд үзүүлэх тусламж дэмжлэгийг тасалдуулж болзошгүй байгааг энэ уулзалтын үеэр Европын гадаад бодлогын тэргүүн Жозеп Боррел анхааруулсан юм.
Саяхан АНУ-ын конгресс ирэх санхүүгийн жилийн төсвийг батлахдаа Украинд үзүүлэх тусламжийн хэсгийг тусад нь шийдвэрлэхээр салгаж үлдээсэн нь хууль тогтоогчдын зөрчил маргаантай холбоотой байв.
“АНУ-ын үлдээсэн орон зайг Европ нөхөх боломжгүй” гэж Боррел энэ үеэр хэлсэн юм.
Уулзалтын үеэр Зеленский агаарын довтолгооноос хамгаалах пуужингийн систем нэмж илгээхийг Европын удирдагчдаас хүсэж, Оросын эзлэн түрэмгийллээс хамгаалж байгаагийнх нь төлөө бусад улс орнууд Украинд талархах ёстойг сануулжээ.
Эх сурвалж: BBC
