Каннибализм буюу нэг төрөл зүйлийн амьтад бие биеэ хүнсэнд хэрэглэх явдал эртний Европ тивийн оршин суугчдын дунд түгээмэл байсныг эрдэмтэд тогтоожээ.
Одоогоос 11,000-17,000 жилийн өмнө буюу Магдалений дээд палеолитын үед Европ тив даяар амьдарч байсан хүмүүс талийгаачдыг оршуулалгүй, хүнсэндээ хэрэглэдэг байсныг “Quanternary Science Reviews” сэтгүүлд нийтлэгдсэн судалгааны тайланд өгүүлсэн байна.
Франц, Герман, Испани, Орос, Британи, Бельги, Польш, Чех, Португал улсуудын нутагт оршдог энэ цаг үеийн нийт 25 олдворыг эрдэмтэд судлаад ийм дүгнэлт гаргажээ.
Эдгээрээс олдсон хүмүүсийн яснаас шүдний ором, гавлын ясаар хийсэн аяга, чөмгийг нь хүнсэнд хэрэглэж байсан баримтууд олдсон байна.
Зарим тохиолдолд талийгаачдынхаа махыг бусад амьтны махтай хольж хэрэглэдэг байсан нь тогтоогджээ.
Эрдэмтэд өмнө нь каннибализмын ул мөрийг Британи арлын Гофийн агуй зэрэг хязгаарлагдмал хүрээллээс олж байсан юм. Харин энэ удаа ийм зуршил Европ даяар түгээмэл байсныг анх удаа судалж тогтоожээ.
“Магдалений үеийн хүмүүсийн дунд талийгаачийн шарилыг идэж устгах арга түгээмэл байсныг бидний судалгаа баталлаа” гэж тайланд дүгнэн бичсэн байна.
Судалгааг ахлагчдын нэг доктор Силвиа Белло эртний хүмүүсийн энэ ёс нь хүнсний хэрэгцээтэй хамаагүй, харин зан үйлийн хэлбэртэй байсныг тайлбарлажээ.
“Палеолитын төгсгөл үед Европ тивийн оршин суугчдын дунд генетикийн болон оршуулгын зан үйлийн аль алиных нь өөрчлөлтүүд гарсныг эндээс харж болохоор байна. Эртний хүмүүсийн нэг бүлэг нүүдэллэн ирснээр өмнөх бүлгийн хүмүүсийн генийн бүтэц төдийгүй зан үйл нь хүртэл өөрчлөгдөж байжээ. Тухайлбал Эпиграветтийн бүлэг хүмүүс хойд зүгт нүүдэллэж тэлснээр ийм өөрчлөлт гарсан байна” гэж судалгаанд оролцсон доктор Уилльям Марш ярьсан байна.
Эх сурвалж: Business Insider
