Бямба гарагийн өглөө эрт Газын зурвасаас Палестины Хамас зэвсэгт байгууллага Израиль улсын газар нутагт гэнэт халдан довтолсон нь Ойрх Дорнодын нөхцөл байдлыг хурцатгаад байна.
Израилийн ерөнхий сайд Бенжамин Нетаньяху улс орноо дайны байдалд шилжүүлж, “Төмөр Илд” нэртэй ажиллагааг эхлүүлснээ зарласан.
АНУ-ын засаг захиргаа ерөнхийлөгч Барак Обамагийн үед Израиль улсад жил бүр $3.8 тэрбумын зэр зэвсгийн тусламж үзүүлэх үүрэг хүлээж байсан бол одоо үүнээс гадна нэмж туслах асуудлыг хэлэлцэж эхэлжээ.
Ням гарагийн байдлаар Израиль улс 600 гаруй иргэн нь алагдсаныг зарласан байна. Үүнээс гадна 2,048 хүн шархадсанаас 200 орчмынх нь биеийн байдал хүнд байгааг мэдээлжээ.
Тэгвэл эсрэг талд буюу Газын зурваст 370 хүний амь үрэгдэж, 2,200 орчим хүн шархадсаныг Хамасын албаныхан мэдээлсэн байна.
Газрын зурваст 20,000 гаруй палестин хүн НҮБ-ын ажиллуулдаг сургуулиудад толгой хоргодож байгааг тус байгууллага мэдээлжээ.
Хамас зэвсэгт байгууллага өнгөрсөн хугацаанд 100 гаруй иргэнийг нь барьцаалсныг Израилийн засгийн газар мэдээлсэн байна.
Тэдгээрийг өөрийн мянга мянган олзлогдсон гишүүнээр солих төлөвлөгөөтэй байгаа бололтой.
Газын зурвасын 426 цэгт өгсөн Израилийн хариу цохилтын үеэр Хамасын төв удирдлага байрладаг 14 давхар барилга сүйрсэн байна.
Энэ үеэр Хамасын дээд удирдлагуудын нэг Айман Юнус алагдсан тухай Газын зурвасаас мэдээлжээ.
Ням гарагт Ираны ерөнхийлөгч Эбрахим Райси палестин үндэстэн өөрийгөө хамгаалах хууль ёсны эрхтэйг мэдэгдээд “Сионист дэглэм болон түүний дэмжигчид бүс нутгийн тогтворгүй байдалд буруутай” гэж анхааруулжээ.
Ираны дэмжлэгтэй Ливаны шийт исламын зэвсэгт хөдөлгөөн Хезболлах өчигдөр Израилийн нутаг руу олон тооны пуужин харваж, их буугаар гал нээснээ “Хамастай эв нэгдэлтэй байгаагийн илэрхийлэл” гэж мэдэгдсэн байна.
Дайн урт хугацаанд үргэлжилж болзошгүйг Израилийн ерөнхий сайд Нетаньяху өчигдөр X хуудсандаа анхааруулжээ. “Бид Хамасын алан хядагчдын халдлагын улмаас урт бөгөөд хүнд хэцүү дайныг эхлүүлж байна” гэж тэр бичсэн байна.
Ням гарагт АНУ-ын батлан хамгаалахын сайд Ллойд Остин тус улс Израилийг дэмжих зорилгоор Форд тэнгисийн цохилтын бүлэглэлийг Газар дундын тэнгисийн зүүн хэсэгт илгээж байгааг мэдэгджээ.
Уг бүлэглэлийн цөм болсон USS Gerald R.Ford нисэх онгоц тээвэрлэгч хөлөг нь АНУ-ын тэнгисийн зэвсэгт хүчний хамгийн орчин үеийн техник юм. 5,000 орчим усан цэргийн бүрэлдэхүүнтэй уг хөлгийг сөнөөгч нисэх онгоцнууд, тэнгисийн байлдааны хөлгүүд дагалдаж байна.
Хамасын халдлагын үеэр Израильд АНУ-ын 11 иргэн алагдсан гэсэн мэдээлэл ирж байгаа. Энэ тоо цаашид өсөх магадлалтай байна.
Палестин-Израилийн сөргөлдөөн олон арван жил үргэлжилсний эцэст ийнхүү тэсэрч байна. Ялангуяа энэ онд нөхцөл байдал улам бүр хурцадсан юм.
Бямба гарагаас өмнө энэ оны байдлаар 247 палестин, 32 израиль хүн, хоёр гадаадын иргэн алагдаад байв.
Палестины газар нутагт Газын зурвас болон Йордан голын баруун эрэг хэмээх хоёр тусдаа хэсэг багтдаг. Хамас зэвсэгт байгууллага 2007 онд Палестины засаг захиргаанаас Газын зурвасыг булаан хяналтдаа авсан юм.
Тэр үеэс хойш Израиль, Египет улсууд болон Газар дундын тэнгисийн завсарт хашигдсан 2.3 сая оршин суугчтай энэ зурвас газар үндсэндээ гадаад ертөнцөөс тусгаарлагдаад байв.
Өнгөрсөн хугацаанд Хамас болон Израилийн талуудын хооронд олон удаа богино хугацааны дайн гарч байлаа. Хамгийн сүүлд энэ оны тавдугаар сард зэвсэгт мөргөлдөөн гарахад 34 палестин, нэг израиль хүн алагдаж байжээ.
Иерусалем хот оршдог Баруун эрэгт ч нөхцөл байдал эмзэг байгаа. Энэ он гарсаар энд Израилийн хууль сахиулагчид болон шилжин суурьшигчидтай үүсгэсэн мөргөлдөөний улмаас таван палестин хүн алагдаж, 120 орчим хүн шархадсан тухай Палестины засаг захиргаанаас гаргасан тоо байдаг.
Эх сурвалж: AFP
