Бямба гарагт Афганистаны баруун бүсийн Херат хотоос 35 км зайтай газарт 6.3 магнитудын хүчтэй газар хөдөлсөн юм.

Талибаны засгийн газар энэхүү байгалийн гамшгийн үеэр амиа алдсан хүний тоо 2,400 давсныг Ням гарагт зарлажээ.

Үүнээс гадна 2,000 орчим хүн бэртэж гэмтсэн байна.

Ням гарагийн өглөө Улаан хавирган сар нийгэмлэг амиа алдсан хүний тоог 500 орчим гэж мэдээлж байсан бол ийнхүү нэг өдрийн дотор огцом нэмэгджээ. Тоо цаашдаа өсөхөөр байна.

Газар хөдлөлтийн үеэр 1,320 орчим өрхийн байр сууц нурж, гэмтсэнийг Талибаны гамшигтай тэмцэх яамны төлөөлөгч Жанан Сайик мэдээлсэн байна.

Аврах ажиллагаанд хүнс, ундны ус, эм тариа, хувцас, майхан яаралтай хэрэгтэй байгааг Катар дахь Талибаны төлөөлөгчдийн тэргүүн Сухайл Шахен сэтгүүлчидтэй уулзахдаа мэдэгджээ.

Хөрш Пакистан улсын засгийн газар тусламж үзүүлэх талаар Талибаны эрх баригчидтай холбогдож эхэлснээ мэдэгдсэн байна.

Уулархаг газар нутагтай Афганистан улс газар хөдлөлтийн аюултай бүсэд байрладаг.

Олон арван жилийн дайны улмаас дэд бүтэц, харилцаа холбоо муу хөгжсөн тус улсын алслагдсан хязгаар нутгуудаас хохирлын талаар мэдээлэл авах, аврах ажиллагаа явуулахад хэцүү байдаг юм.

2022 оны зургаа дугаар сард Афганистаны зүүн хэсгийн уулархаг нутагт газар хөдлөхөд 1,000 гаруй хүний амь үрэгдэж, 1,500 орчим хүн бэртэж байв.

Афганистаны эрүүл мэндийн систем үндсэндээ гадаадын тусламж дэмжлэгээс зуун хувь хамааралтай байдаг. Хоёр жилийн өмнө Талибаны дэглэм засгийн эрхийг авснаас хойш уг тусламж зогссон юм.

Эх сурвалж: Reuters