Дэлхийн дулаарал эрчимжих тусам хүмүүсийн гадаад аялалд хязгаар тогтоож, үүнийг нүүрстөрөгчийн паспорт (carbon passport) хэмээн бичиг баримтаар зохицуулдаг болж магадгүй талаар Intrepid Travel олон улсын аялал жуулчлалын компаниас саяхан нийтлүүлсэн тайланд анхааруулжээ.
Ялангуяа жуулчдын хэт ачааллын улмаас сүйрч байгаа аялал жуулчлалын алдартай бүс нутгуудад ойрын ирээдүйд ийм хязгаарлалт тавигдаж болзошгүй гэнэ.
Өөрөөр хэлбэл хүмүүс өнөөдрийнх шиг чөлөөтэй аялах боломжгүй болж, зөвшөөрлөөр олгогдсон тодорхой квоттой болох ажээ.
“Энэ хязгаарлалт нь 2050 он гэхэд дэлхий нийтээр хүлэмжийн хий ялгаруулалтыг жилд 750 тэрбум тоннд барих төлөвлөгөөтэй уялдаж гарах болно. 2040 он гэхэд бид жил тутмын аяллын хязгаартай болох өндөр магадлалтай” гэж дээрх тайланд бичсэн байна.
Intrepid Travel компани энэ тайлангаа ирээдүй судлалын The Future Laboratory агентлагтай хамтран боловсруулжээ.
Тайланд жишээ болгон Грек улсыг дурдсан байна.
Грекийн арлуудад жил бүр олон мянган жуулчин ирснээр байгаль орчинд нь сөрөг нөлөө үзүүлдэг болсон. Үүний нэг илрэл нь тус улсын Родос арлуудад өнгөрсөн зун гарсан ой хээрийн их түймэр юм.
“Уур амьсгалын өөрчлөлтийн шууд нөлөөг хэт алсын зүйл мэт бодсоор ирсэн. Гэвч өнөөдөр бидэнд шууд мэдрэгдэж эхлээд байна. Аялал жуулчлалын одоогийн загвар өөрчлөгдөж, байгаль орчны дахин сэргээгдэх шаардлагатай уялдах хэрэгтэй болоод байна. Уур амьсгалын өөрчлөлтийг өрсөлдөөний давуу тал гэж харахаа болих, тогтсон бизнесийн хэв маягаа өөрчлөх шаардлага бидэнд тулгарч байна. Манай гарагийн болон аялал жуулчлалын салбарын ирээдүйг тоолох цаг нэгэнт яваад эхэлсэн. Үлдсэн цаг хугацаа хязгаартай тул аялал жуулчлалын салбарыг хүлэмжийн хийгээс чөлөөлж, салбарынхаа тогтвортой хөгжлийн асар их боломжийг бодитой хэрэгжүүлэхийн төлөө яаралтай хамтран ажиллах, шинэчлэл хийх шаардлагатай боллоо” гэж Intrepid Travel компанийн ерөнхийлөгч, хамтран үүсгэн байгуулагч Даррел Уэйд мэдэгдэлдээ бичжээ.
Эх сурвалж: DPA