Даваа гарагт дэлхийн тойрог зам дахь Олон Улсын Сансрын Станцын нэг сегментэд гэмтэл гарч, хөргөлтийн шингэнээ задгай сансарт алдаж эхэлжээ.
Станцын энэ хэсэг нь Оросын эзэмшлийн модуль юм байна.
NASA-гийн шууд дамжуулалтын дүрсээс задгай сансарт хөргөлтийн шингэний мөстсөн хэсгүүд цацагдаж байгаа харагджээ.
NASA-гийн мэргэжилтнүүд хаанаас ийм алдагдал үүссэнийг шалгуулахаар станцад байгаа АНУ-ын сансрын нисгэгч Жасмин Могбелид хандсан байна.
“Алдагдал “Наука” модулийн гадаад радиаторын хэсгээс гарч байна” гэж Могбели төвдөө хариулжээ.
“Наука” нь 2021 онд Олон Улсын Сансрын Станцад залгагдсан модуль юм байна.
Өнгөрсөн нэг жил хүрэхгүй хугацааны дотор Оросын станцын хэсгээс гурав дахь удаагаа хөргөлтийн шингэн алдагдсан нь энэ юм.
2022 оны арванхоёрдугаар сарын 15-нд тус станцад залгагдсан Оросын Союз МС-22 хөлгөөс хэдэн цагийн турш шингэн алдагдаж байжээ.
Тухайн үед ямар нэг солирын хэлтэрхий мөргөснөөс радиатор хагарсан байж болзошгүй гэж дүгнэсэн байна.
Битүүмжлэл нь алдагдсан Союз хөлөг сансрын нисгэгчгүйгээр дэлхий рүү буцаж, хэдэн сарын дороо орлох хөлөг нь ирж байжээ.
Үүний улмаас тухайн үед тойрог замын станцад байрлаж байсан Оросын хоёр, АНУ-ын нэг сансрын нисгэгчийн буцах хугацаа нэлээд хойшилж, дөнгөж өнгөрсөн сард л дэлхийд ирсэн юм.
Ижил төстэй алдагдал энэ оны хоёрдугаар сарын дундуур Оросын Прогресс МС-21 ачааны хөлөгт бас гарч байжээ.
Уг хөлөг 2022 оны аравдугаар сард Олон Улсын Сансрын Станцад залгагдаж байв.
Ижил алдаа гурван удаа давтагдсан нь асуудал солир мөргөснөөс болоогүй, өөр шалтгаантай байх магадлалыг нэмэгдүүлж байна.
Сансар судлаач Жонатан Макдоуэл энэ талаар “Хөргөлтийн шингэн алдагдах гэмтэл гурван удаа давтагдлаа. Нэг удаа бол ямар ч шалтгаантай байж болно. Хоёр дахь удаагаа бол санамсаргүй давхцал байж болно. Харин гурав дахь удаагаа давтагдсаныг би системийн хэмжээний асуудал гэж үзэж байна. Энэ нь Оросын сансрын системийн найдвартай байдал суларсны шинж гэж би бодож байна. Наймдугаар сард тэдний станц саран дээр бууж чадаагүйг үүн дээр нэмж хэлэх хэрэгтэй” гэж ярьжээ.
Оросын сансар судлал нь олон жилийн турш тус улсын бахархал болж ирсэн салбар юм.
Гэхдээ сүүлийн жилүүдэд энэ салбар хөрөнгө мөнгөөр гачигдаж, авлигын хэл ам, дуулианаас салахаа болиод байгаа.
Хэдийгээр хоёр улсын харилцаа Украины дайнаас шалтгаалан муудсан ч Олон Улсын Сансрын Станц нь Москва, Вашингтоны хамтын ажиллагаагаа үргэлжлүүлж буй цөөхөн салбаруудын нэг юм.
Эх сурвалж: AFP
