Азербайжаны ерөнхийлөгч Илхам Алиев саяхан хяналтаа тогтоосон Уулын Карабахын төв Ханкенди (арменичууд Степанакерт гэдэг) хотод өчигдөр анх удаа зочилж, төрийн далбаагаа мандуулжээ.
Өнгөрсөн сард Азербайжаны арми энэ бүс нутагт 24 цагийн хугацаатай байлдааны ажиллагаа явуулсны үр дүнд армени үндэстний салан тусгаарлагчдыг буулгаж авсан юм.
Ингэснээр 30 орчим жил Арменийн засгийн газрын дэмжлэгтэй салан тусгаарлагчдын хяналтад байсан Уулын Карабах албан ёсны эх орондоо буцаж нэгдээд байгаа.
Өнгөрсөн хугацаанд Азербайжан, Армени улсууд энэ нутгийн төлөө хоёр удаа дайтаж байжээ.
Эхний дайны дараа 1994 онд Уулын Карабах арменийн салан тусгаарлагчдын хяналтад бүрэн шилжиж байв. 2020 онд болсон дараагийн дайнаар Азербайжан улс Уулын Карабахын зарим хэсэг болон өмнө нь салан тусгаарлагчдад алдаад байсан ойр орчмын газар нутгаа буцаан авсан юм.
Азербайжаны хяналтад шилжсэний дараа Уулын Карабахаас 100,000 орчим армени хүн хөрш Армени улс руу дүрвээд байгаа.
Алиев өчигдөр Уулын Карабахт очихдоо Агдара, Хоцали зэрэг өөр хэд хэдэн хотод зочилж, мөн төрийн далбаагаа мандуулжээ.
Өчигдөр буюу аравдугаар сарын 15-ны өдөр бол Алиевын хувьд Азербайжаны ерөнхийлөгчөөр анх удаа сонгогдсоны 20 жилийн ойн өдөр юм.
Эх сурвалж: AFP
